مواقف من الاستفتاء على دستور الإخوان

آه صحيح.. بس مش لاقيين غيرك وأنت إخوان وعامل جمعية خيرية جدرانها ملاصقة للجنة وكل أسماء الناس المدونة عندك فى الدفتر من محيطها؟!!
قصدك إيه؟
لأ ولا حاجة.. بس علشان محدش يقول إنك مظبط السكان بتوع عزبتك اللى بيحضروا عندك الجمعية ياخدوا صدقة وإن تصويتهم عندك فى اللجنة زى مابتقول لهم فى ساعة صرف الكفالة لهم، يعنى ولامؤاخذة إحنا بنقول تجنباً للشبهات.

يا عم حسين ربنا قال ما معناه "فتبينوا.. أن تصيبوا قوماً بجهالة"، يعنى مايصحش تظلمنى.
طيب واللى جنبك ده برضه مدرس ولا إخوان بالصدفة؟
ههههههههه.. روح اسأله.

لأ يا عم مش ناقص غير 10 دقائق وعاوز أبصم حضور.. هات الاستمارة بتاعة إبداء الرأى.
خدها من الموظف اللى جنبى وسيب البطاقة بتاعتك هنا.
...الاستمارة أهيه يا أستاذ.. أى خدمة.
طيب فين الدستور؟؟
دستور إيه؟!!
أنت أعطتنى استمارة فيها "هل توافق على الدستور أو لا توافق".. لكن مش مرفق معها الدستور!!
باشا.. كلم رئيس اللجنة.. أهو عندك.
تقبل الله يا حضرة المستشار.. أنت كنت بتصلى؟!
منا ومنكم.. وفيها إيه!!
لأ ولا حاجة.. بس هو أنا ممكن أصور الصندوق وهو مليان ورق كده زى ما أنت عملت بالموبايل بتاعك حالاً؟
لأ طبعاً.. أنا بأصور لأنى رئيس اللجنة..!!
طيب يا رئيس اللجنة ممكن أعمل عندك محضر؟
ليه يا أستاذ؟
لأنى مش عارف هاستفتى على إيه.. الدستور مواده مش موجودة مع استمارة إبداء الرأى، ولم تنشر مواده النهائية فى الصحيفة الرسمية للدولة أو صحيفتين واسعتى الانتشار، وكل اللى تحصلت عليه مجرد مسودات غير رسمية وغير ممهورة بتوقيع رئيس لجنة الدستور.. الغريانى باشا زميلك.

ممكن حضرتك تخرج بره اللجنة وتتصرف فى أى نسخة تقرأها وترجع تصوت.
بس أنا حضرت ووقعت حضور وخروجى دون إبداء رأيى غير قانونى.. ورفضك تحرير محضر إثبات حالة لى غير قانونى أيضاً، وأنا عاوز أعمل المحضر علشان يساعدنى فى الطعن القضائى على إجراء الاستفتاء.. أنت قاضى وعارف بقى الإجراءات.

وأنا مش هاعمل لك محضر وممكن تروح اللجنة العامة أو العليا وتشتكى.
طيب ممكن اسمك معالى المستشار ورقم عضويتك بنادى القضاة وممكن أشوف الكارنيه بتاعك؟
أنت يا أستاذ ياللى بتكلم الراجل بتاع اللجنة.. أنا المنطقة دى بتاعتى واللجنة دى بتاعة منطقتى ومحدش ييجى يعمل لنا باللو علشان يبوظ علينا عروسة الديمقراطية بتاعتنا.

ممكن يا حضرة المستشار تقول لى مين اللى أدخل الشخص ده هنا وإزاى تسمح له بكدة وإزاى يقول عليك "الراجل بتاع اللجنة"؟!!

لأ.. فكك منه وخليك فيا أنا.. أنا مش هاعمل لك محضر ولا هاطلع الكارنيه بتاعى ولو مش عاوز تضع استمارة رأيك فى الصندوق سيبها وامشى.. وابقى اشتكينى.
بجد!!
آه وعهد الله.. وابقى قول فى محضر بره اللى أنت عاوزه.. بس مش هنا إحنا مش فاضيين لك.
أشكرك يا "أخ" مستشار.. سلام.
وبعد فض اعتصامى رابعة والنهضة بأسبوعين...
فوضت السيسى..فوضته خلاص.. قتلوا إخواتنا..بالرصاص.
مش اللى بيهتف فى المترو مع الإخوان ده يا أستاذ حسين الواد اللى كان بيتبلطج عليك فى لجنة الاستفتاء..؟
آه هو بعينه.. أنا فاكر ملامحه كويس لأنه كان معايا فى مدرستى الابتدائية.. لكن طفولته لا علاقة لها بسلوكه أو تعليمه أبداً.
وقبل أسبوع من الاستفتاء على دستور 2014 اليوم..وداخل نفس محطة وعربة المترو ليلاً..
حد عاوز كارت ميمورى بـ3 جنيه.. كشاف وولاعة بـ3 جنيه.. شاحن نوكيا وسماعة صينى بـ3 جنيه.......
"نفس الصوت لنفس الشخص".. لله الأمر من قبل ومن بعد.