ياريس.. الشاطرة بتغزل برجل حمار

كانت عقدتى الوحيدة فى الدراسة هى مادة الإنجليزى لدرجة أننى كنت بهرب من حصصها عشان مشوفش المدرس اللى بيقولوا عليه " المستر ده " وكانت ديما أمى تقوللى يابنى انت بليد ليه كده فى المادة دى؟ .... فكانت إجابتى الوحيدة .... أصل المدرس بتاع الإنجليزى بتاعنا ضعيف قوى، فردت عليا أمى وقالتلى "المدرس ملهوش دعوة بخيابتك لأن الشاطرة بتغزل برجل حمار يابيه" وأنا هقتبس المثل بتاع أمى وأقوله للريس .... يا ريس الشاطرة بتغزل برجل حمار.. هو ليه كل لما كارثة تحصل فى البلد تطلع رجالتك وتقول أصل دى مخلفات النظام السابق؟!  وإن مصر إمكانياتها ضعيفة ومفيش إنتاج ولا فى فلوس والدنيا خربانة.. والله ياريس إحنا عارفين الكلام ده بس إحنا مش انتخبناك عشان كل شوية تقوله لينا.. حوادث القطارات والشباب اللى كل يوم بيموت دى مسئوليتك والاعتصامات والخراب اللى حل على البلدى من يوم توليك لمنصبك برضه مسئوليتك، واحنا مش زعلانين على القطارات اللى كل شوية تخبط فى بعضيها من يوم قعدت على الكرسى أكثر ما إحنا زعلانين على قطر العمر اللى كل لحظة بيتقلب بشباب مصر لما الأمل فى المستقبل بينطفى قدام عينيها شوية بشوية.. هو يعنى يا ريس إحنا انكتب علينا كشباب إننا نقضى عمرنا ما بين حكم نظام فاسد وبين فترة انتقالية ياعالم هتخلص إمتى؟! وبالرغم من كل الحجج اللى نظامك ماسك فيها أحب أقولك مصر مش رجل الحمار إحنا يا ريس متأكدين إن إماكنيات مصر كبيرة قوى فوق ما تتخيل بس للأسف مش متأكدين إنك شاطر عشان تعرف تغزل بيها ممكن يكون بيساعدك الشاطر بس برضه لا سيادتك ولا الشاطر شطار عشان كده عمر مصر ما هتشوف يوم ييجى فيه حد بيغزل برجل حمار طول ما سيادتك قافل الباب عليك وعلى جماعتك.. ولو أنا خايب فى الإنجليزى حضرتك مش شاطر فى قعدتك على الكرسى وهيفضل المثل بتاع أمى هو اللى ينطبق عليا وعليك.. ولّا أقولك عليك انت لوحدك أصل أنا خلصت تعليم من زمان ونجحت فى الإنجليزى عقبالك لما تنجح فى حكم مصر.. بالتوفيق ومستنى النتيجة.