10 نصائح لزائرى سور الأزبكية

معرض الكتاب شغال من كام يوم، لكن نظرا لارتفاع سعر الدولار وأن الكتب بقت أغلى من كيلو اللحمة أصبح سور الأزبكية ملتقى كل أطياف الشعب ورمز الوحدة الوطنية والتكافل الاجتماعى، يعنى ساكن التجمع الخامس جنب بجنب قدام ساكن الدويقة.

من هنا قررت "فيتو" أن تلقى بخبرتها فى هذا الأمر حتى تساعد على زيادة الوحدة الوطنية والألفة بين قوى الشعب، ما أكتبه الآن هو خبرة 11 سنة متابعة لسور الأزبكية ومكتبات الكتب القديمة فى القاهرة، ضعوها فى الاعتبار.

1- إوعى تطلب كتاب بالاسم من البائع، هيعرف إنك محتاجه وهتلبس فى الحيط يا معلم.
2- لو لقيت عنوان يهمك وهتموت وتشتريه إسأل عن أسعار الكتب إللى فى نفس الركن وإوعى تحسسه إنك قاصد كتاب بعينه.
3- لو صاحب المكتبة قالك كل كتاب بسعر لف وارجع تانى واعلم أنك وقعت فى عباءة حوت هيخليك تبيع هدومك.
4-فى السور بتلاقى كتب للعرض وكتب داخل المكتبة، العب دايما على العرض لأنهم بيجيبو رجلك بعناوين تشد، إنما لو دخلت جوة المكتبة هتخرج بلبوص.
5-اعمل نفسك شحات وإوعى تعمل فيها ابن ناس وبابى ومامى، هيستغل الفرصة والكتاب أبو جنيه هيبيعهولك بالدولار.
6- ما تشتريش من أول مكتبة تقابلك، وخليك متأكد إن تاجر واحد إللى بيبع لكل المكتبات، يعنى الكتاب أبو عشرة جنيه هنا ممكن تلاقيه بجنيه فى مكان تانى.
7- لو عاوز تشترى رواية اشتريها من مكتبة متخصصة فى الكتب الدينية. الرويات عندهم من باب العلم الذى لا ينفع وبيبقوا عاوزين يتخلصوا منها عشان البركة تحل على المكان.
8- أما بقى لو لسه سامعلك محاضرة لعمرو خالد وعاوز تتوب يبقى تشترى الكتب الدينية من عند واحد كل كتبه قصص وروايات، الناس دى بتبقى فى الغالب معفنين وبياكلوا حبنة نستو وممكن يدوك الكتب الدينية وعليها رواية هدية.
9- لو لقيت مكتبة أسعارها حنينة إوعى تسيبها، خدها فحت وردم، لكن خليك حذر وكل شوية اسأل عن الأسعار أحسن بتوع الأزبكية عندهم زهايمر، ممكن يقلك فى الأول جنيه وبعد شويه يعمل نفسه عبيط ويلبسك.
10- وأنت بتحاسب ادعيلى وافتكرنى بكتاب وعنوان الجرنان موجود على الموقع يا معلم.