عشمتني بالحلق.. خرمت أنا وداني
بعد قرار الحكومة برفع الحد الأدني للأجور إلى 1200 جنيه، كل الشعب المصري هاص وزاط والموظفين نزلت الشوارع وشغلوا دي جي عمرو حاحا على أغنية "مش هروح"، والخالة أم عمر والعمة عطيات وزعوا الشربات على الرايح والجاي في الشارع والزغاريد صوتها مسموع من كل البيوت، ومسئولو الحكومة طلعوا في التليفزيون يطمنوا الناس ويقولوا من أول يناير يتنفذ القرار.. كل ده والناس مصدقة إن الكلام بجد، الناس نامت سعيدة لكن في مفاجأة حصلت، إن الناس كلها جالها كوابيس قال إيه، الحكومة بتكدب على الموظفين وإنه لا في زيادة ولا حاجة، الناس لبست هدومها ونزلت تشم هوا على القهاوي، قعد عم أحمد الراجل الكبارة المهندس اللي على المعاش، مع الولا حموكشة- على وش تعيين قريب – ومعهم عبده وش القفص اللى مرتبه 700 جنيه وشغال موظف في السكة الحديد، وسمعان اللي علطول عيان، خبط كل واحد فيهم على إيده، نده الولا سردينة صبي القهوجي بصوت عالي "أيوه جااااااي " طلبوا شاي كلهم وتكشيرة كبيرة على وشهم، سأل عم أحمد مالكم يا ولاد متضايقين من إيه خير اللهم اجعله خير..
قال الولا حموكشة كبوس يا عم أحمد: حلمنا إن الحكومة بتكذب علينا وإنه مفيش زيادة في المرتبات ولا في حد أدني ولا دياولوا، ضحك العم أحمد وقالهم هي دخلت عليكم، أما أنتم بصحيح.........، وقال الحكومة عاملة زي فيلم أنا لا أكذب ولكني أتجمل، تريد أن تظهر إنجازات سريعة ليها بعد سقوط الإخوان، فقالت نرفع الحد الأدني للأجور، لكن اللي أنتم متعرفهوش أن أحمد مش زي الحاج أحمد، فتح سمعان اللي علطول عيان بقه وقال يعني إيه؟!
قال عم أحمد: بص يا سمعان وزارة المالية لا تملك الميزانية الكافية علشان زيادة المرتبات وظروف البلد وحشة أوي.. قوم إيه الحكومة مش هتقدر تنفذ القرار في يناير اللي جاي... قوم إيه تأجل القرار علشان البلد حالتها وحشة... قوم إيه القرار يعفن في درج مكتب رئيس الوزراء.. قوم إيه الناس تنسي الحد الأدني واللي مش أدني ولسان حالهم عشمتني بالحلق خرمت أنا وداني، لا شوفت زيادة مرتبات ولا حتي حد جنيه اداني.
بلم الولا عبده وش القفص وقال أنا مش فاهم حاجة.. حد يفهمني.. يعني أنا مرتبي مش هيزيد على 700 جنيه، هاعمل أنا إيه ولا إيه ولا إيه.."هاراسود"..
قال عم أحمد بالعربي الفصيح: حتي لو الحكومة زودت المرتبات إخواتكم ع القهوة العواطلية مش هيلاقوا شغل يعني الأسعار هتزيد بجنان ومن غير حسبان، يعني في الأول وفي الآخر ضحكوا عليك يا غلبان وهتفضل ياواد يا سمعان يا عيان غلبان وفقران،.. روح يا ولا نام واستغطي واستني الحكومة ع المحطة واركب قطر الحياة القاسي اللي بيفرم البني آدمين وما تحلمش يا حموكشة لتلاقي نفسك في مستشفي المجانين قاعد وحاجز هناك جناح، وما تقلقش الحكومة بتحوش لك الفلوس الزيادة علشان تقبضها بس مش لما تموت.. لما تشوف حلمة ودنك!
قال عم أحمد: بص يا سمعان وزارة المالية لا تملك الميزانية الكافية علشان زيادة المرتبات وظروف البلد وحشة أوي.. قوم إيه الحكومة مش هتقدر تنفذ القرار في يناير اللي جاي... قوم إيه تأجل القرار علشان البلد حالتها وحشة... قوم إيه القرار يعفن في درج مكتب رئيس الوزراء.. قوم إيه الناس تنسي الحد الأدني واللي مش أدني ولسان حالهم عشمتني بالحلق خرمت أنا وداني، لا شوفت زيادة مرتبات ولا حتي حد جنيه اداني.
بلم الولا عبده وش القفص وقال أنا مش فاهم حاجة.. حد يفهمني.. يعني أنا مرتبي مش هيزيد على 700 جنيه، هاعمل أنا إيه ولا إيه ولا إيه.."هاراسود"..
قال عم أحمد بالعربي الفصيح: حتي لو الحكومة زودت المرتبات إخواتكم ع القهوة العواطلية مش هيلاقوا شغل يعني الأسعار هتزيد بجنان ومن غير حسبان، يعني في الأول وفي الآخر ضحكوا عليك يا غلبان وهتفضل ياواد يا سمعان يا عيان غلبان وفقران،.. روح يا ولا نام واستغطي واستني الحكومة ع المحطة واركب قطر الحياة القاسي اللي بيفرم البني آدمين وما تحلمش يا حموكشة لتلاقي نفسك في مستشفي المجانين قاعد وحاجز هناك جناح، وما تقلقش الحكومة بتحوش لك الفلوس الزيادة علشان تقبضها بس مش لما تموت.. لما تشوف حلمة ودنك!
