تكلم حتى تاخد على قفاك!!

يحصل ايه دلوقتي لو أنا كتبت كلمتين مش ولابد عن مثلا مثلا شيخ كبير من مشايخنا العظام وقلت إنه كان منافق أو أنه مش متسامح وأنه استغل شهرته في الترويج لشركات توظيف الأموال مثلا مثلا أي كلام في أي كلام..

الرد الطبيعي على اللي كتبته دا إنه هيتلعن سلسفيل اللي جابوني صح.. طبعا صح مع إن الغريبة يا اخي إن الرسول نفسه اتقال فيه اللي قاله مالك في الخمر من كفار قريش دول قالوا عليه مجنون وهو أكرم بني آدم صح..

يبقى فين المشكلة هنا يبقى أنا اللي مش متسامح عشان قلت رأي ممكن يكون غلط ولا أنت متعصب عشان شتمتني دفاعا عن قناعتك بأن الراجل دا لا في قبله ولا في بعده..

نرجع تاني لأول السطر ونقول إن الإرهاب مش بس إنك تهددنني بسلاح وسنجة وتوقفلي في الشارع زي الشمحطية.. لا دا ممكن كمان يكون معنوي يعني أنت تمنعني عن إن اقول رأي عشان أنا متوقع منك إنك هتشتم أو هتحبس أو هتقتل يبقى أنت إرهابي أصلي أصلي مفيش كلام..

طب لو سبناها عمال على بطال وكل واحد يقول رأيه مش ممكن تبقى فوضى.. دا ردك علىّ مش كدا؛ لا أنا موافقك في دي وأبصملك بالعشرة أنك معاك حق لكن نخليها في الثوابت يعني لا تشتم ديني ولا اشتم دينك والحاجات دي وكمان لو أنا مش متدين احترم حق المتدين في ثوابته وعقدته..

أنا موافقك بس في حاجات إحنا بندهنها قداسة من غير ما تكون مقدسة ونديها وش لميع مع وش سنفرة مع وش مبالغة مع وش حكاوي وبركات وفي الآخر تطلع كوكتيل قداسة فشر فرغلي وفي الآخر خالص خالص ندافع عنها بالروح وبالدم..
زمااااااااااان سقراط مرة قال: تكلم حتى اراك.... دلوقتي احنا بدلناها وخلناها.. تكلم حتى تاخد على قفاك..... فعلا بلدنا بتطور بينا.