"شفت تحرش" تنشر شهادة فتاة بالدقي
نشرت مبادرة "شفت تحرش" اليوم الأربعاء شهادة إحدى الفتيات حول ما تتعرض له النساء والفتيات في شوارع مصر، والتزمت المبادرة بعدم نشر بيانات الفتاة حفاظا على حقها في سرية بياناتها وهويتها.
نص الشهادة:
أنا (م) عندى 16 سنة متطوعة في جمعية رسالة فرع المهندسين، أنا بتكلم عن صحبتى (س) اللى ما قدرتش تقول بنفسها اللى حصلها عشان هي عارفة إننا حتى لما نقول ده مش حل، بس اللى حصل لصحبتى ده موقف بشع، كانت مروحة من الدار الساعة 8 وكانت واقفة مستنية تاكسى عند فرغلى بتاع العصير لبسها عادى جدًا ومحترم ومفيهوش أي حاجة تلفت الانتباه وهى واقفة قرب منها واحد كان طويل وضخم كدة واسمر وبشنب وشعره خفيف.
بدأ يقول كلام وقح وحط إيده في وسطها هي بنت خجولة جدًا ومبتعرفش تتصرف راحت بعدت عنه جه جنبها تانى وراح حاطط إيده في وسطها، المسكينة صعبت عليها نفسها راحت ضربته بالقلم قام هبشها من وشها وراح مسكها جامد من وشها كدة وبدأ يضربها بالقلم لحد ما وقعت على الأرض وفضل يقولها انتى تضربينى أنا وفضل يضربها بالشلوط والناس كانت واقفة تتفرج وبعد ما اضربت واتسحلت جه شاب وبعد الراجل عنها وقوله عيب لما تضرب بنت وبدأت الستات تعدى من جنب صحبتى وهى واقعة على الارض ويقولولها يابنتى اللى بتعمليه ده عيب، واللى تقولها انتى غلطانة تمدى إيدك على راجل ليه، واللى قالت لها إيه يا بنتى اللى عملتيه ده ما تسكتى وتروحى، واللى قالت لها روحى ربنا يهديكى.. مفيش واحدة خدت إيديها حتى وقومتها.
"شفت تحرش" هي مجموعة ضغط مجتمعية تتكون من عدد من منظمات ومبادرات غير حكومية حقوقية ونسوية تعمل مع أفراد المجتمع بشكل فعال، لرصد ووضع آليات وتدابير لمناهضة جريمة "التحرش الجنسى" على المستوى القانونى والنفسى والمجتمعى.
