ساخرون، غراب البين يكتب: كيلو العنب بـ 120 والبطيخ بـ 80
بعد عناء يوم طويل من اللف والدوران والمرازيه فى خلق الله.. قررت أريح جتتى ساعتين.. فوقفت على فرع الشجرة وانكمشت بين أجنحتى وقبل أن أغمض عيناى سمعت صوتا يأتى من المقهى أسفل الشجرة يقول: رايحة بينا على فين يا مصر.. تصور إن كيلو العنب بـ 120 جنيه والبطيخة بقت بـ 80 جنيه وساعات بتتباع بـ 100 جنيه.. هى البلد حصل فيها إيه يا جدعان؟!
وهنا أدركت إن الليلة دى مش هيبقى فيها نوم.. فوقفت على قدمى ونفشت ريشى وأخذت أنعق بأعلى صوتى “قاق قاق” فراح زبائن المقهى يهشوننى ويقولون لى: غور من هنا يا غراب البين جبتلنا النكد والفقر..
فهربت مسرعا ولسان حالى يقول: بقى أنا اللى جبتلكم النكد والفقر أم أنكم من تنكدون على أنفسكم بسبب وبدون سبب؟! يعنى جاى تحكى مشكلتك على المقهى وكأنها مشكله حقيقية ترويها وأنت مهموم من حال البلد اللى منتاش عارف رايحه بيك على فين؟!
ما هو من الطبيعى إن العنب البشاير يكون غالى وخاصة إنه عنب للتصدير.. دا أنت لو سعره 30 جنيه برضه هتقول عليه غالى.. وأظن أنا كغراب أعلم جيدا والطفل الصغير يعلم أن البطيخ بيبقى برضه سعره غالى لما بيظهر فى بداية الموسم كبشاير.. يعنى مفيش أى مفاجأة فى القصة بتاتا البتة.. أما صحيح شوية بنى آدمين بيحبوا يعملوا من “الحبه قُبة”!
