بسمة بوسيل تعلن عودتها لتامر حسني وتكشف كواليس الزواج والطلاق (فيديو)
تامر حسني وبسمة بوسيل، قالت الفنانة بسمة بوسيل: "لما جيت مصر تقريبا كل أحلامي اتحققت، لقيت حب حياتي وفي نفس الوقت كنت بعمل ألبوم مع محسن جابر بس حسيت ساعتها إني عايزة اتجوز اكتر، وحبي لتامر حسني كان أكبر من الغناء".
بداية قصة زواج تامر حسني
وأضافت خلال لقائها ببرنامج "ع المسرح" المذاع علي قناة "الحياة": "وافقت إن ألبومي مينزلش لإني لما أعلن زواجنا أنا وتامر حسني كان هناك حملات غريبة على الإنترنت وقتها تامر كان من باب الحماية وإن محدش يتكلم عني بطريقة مش كويسة نعطل خروج الألبوم، وانا كمان كنت خايفة من نزول الألبوم".
حب العمر لبسمة بوسيل
وتابعت: "الزواج وحب العمر خد مكان النجومية والشهرة والغناء، واتجوزت بدون فستان وحفل زفاف بس انا وتامر حسني اتفقنا علي كده ودي مش غلطته وانا عارفة اني متجوزة حد مشهور جدا، شهرة تامر كنت بالنسبة لي مستفزة ومخيفة وفعلا كنت باهتز نفسيا وبخاف وعملنا فرح وكل حاجة بشكل خاص، ونزل خبر زواجنا في الصحافة، وانا عارفة ان فيه هجوم حصل عليا وكانوا بيجولنا قدام البيت يطالبوه طلقها طلقها، وأمي كانت خايفة وهو كمان كان خايف من تسليط الأضواء على زواجنا".
علاقة تامر حسني وبسمة بوسيل
ولفتت: "تامر حسني لما اختارته مش بس علشان حبيته كشخص ولكن علشان كنت عايزاه يبقى أبو عيالي، وكنت حاسة ان مش أي حد أحبه ينفع يكون أبو عيالي".
وأكدت: "أنا قد حبي للغناء كنت عايزة اتجوز وأنا صغيرة وأخلف وأنا صغيرة وكان حلمي أخلف ولاد وبنات في سن صغيرة، وفي الأول كنت بقول يارب مش ولد لإني معنديش اخوات بنات وعندي 2 ولاد كرهوني في عيشيتي وحاجتي يسرقوها، بس بحب الخلفة ومن الستات اللي بحب الخلفة وعايزة يبقى عند 10 عيال ودلوقتي نفسي اخلف كمان اتنين".
تحرر بسمة بوسيل بعد الطلاق
وأشارت: "بعد طلاقي من تامر حسني اتحررت من حاجات كتير أوي كانت عاملة ليا ضغط، لايف استايل بتاعت تامر صعبة أوي ومتعب جدا وفيه حاجات مكنتش بعرف أعملها، خاصة وأنا معايا 3 عيال".
بسمة بوسيل وحلم العودة لتامر حسني
وأكدت: "حلم رجوعي لتامر حسني هيتحقق وده خبر أكيد يعني، انا دلوقتي متصالحة ومتسامحة مع كل الناس واتغيرت للأحسن بعد الانفصال".
تأثير الانفصال علي بسمة بوسيل
ولفتت: "الانفصال كان بالنسبة لي صعب وانا وتامر حسني بنحب بعض عامة كأشخاص غير كزوجين والشخص ده غالي أوي عليا، ولغاية دلوقتي بيعرف كل حاجة بعملها وبيكلمني علطول ويطمئن عليا، والمصريين بالنسبة لهم الطلاق ده مصيبة واحنا نفس القصة في المغرب، ولكن الطلاق حصل لما وصلنا لمرحلة اننا مكناش عارفين نتكلم مع بعض بس الطلاق كان بالنسبة خضة ومكنتش متوقعة أني اتطلق، وبعد الانفصال قربت جدا من ربنا وبقيت اعمل عمرة 3 مرات في السنة وحسيت ان التعلق لازم يبقى برب العالمين اكتر من البشر".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية
