زوجة حلمي بكر لـ فيتو: ابنه كان في مصر ومجاش سأل على أبوه

أكدت سماح القرشي زوجة الموسيقار حلمي بكر أن نجله “هشام”  عاد من أمريكا الشهر الماضي وظل في مصر 4 أيام ولم يأت لزيارة والده على حد قولها.

وقالت سماح القرشي في تصريح خاص لـ"فيتو":" هشام نجل الموسيقار حلمي بكر كان في مصر 4 أيام قاعد في التجمع الخامس ومجاش زار والده وقال إن المشوار بعيد جي دلوقتي يقول فين بابا … كان هو فين و“الموسيقار” تعبان.

ومن ناحية أخرى، كان كشف هشام حلمي بكر، نجل الموسيقار الكبير حلمي بكر، عن تعرض والده للإهمال والإهانة على يد زوجته الحالية التي تسببت في تدهور حالته الصحية وذلك بعدما نقلته من القاهرة إلى محافظة الشرقية.

تناقض تصريحات زوجة حلمي بكر

وقال نجل الموسيقار حلمي بكر: "أي حد عاقل يسمع كلام زوجته سماح مش هيصدقها، منين إحنا معندناش فلوس نوديه المستشفى وفي نفس الوقت بتقول إن إحنا نقدر نعالجه كويس، منين التليفون يبقى قريب منه بس الدكتور مانعه يتكلم مع أي حد وهي قاعدة جنبه، كلامها ركيك وأنا اتصلت بأبويا من تكساس بأمريكا، وطلبت أكلمه وهي اللي ردت وكانت معاه لسه في المهندسين وزعمت أنها بعيدة عنه ولما تروح بعد تمرين التايكوندو لبنتها هتخليه يكلمني".

تعرض حلمي بكر للإهمال والإهانة

وتابع: "أبويا كان عايش في المهندسين وهي عايشة في الشرقية، الناس بتروح تتعالج في القاهرة وهي بتوديه الشرقية إيه التناقض والأمر المقزز ده، أنا خلاص نازل مصر علشان ألحق أبويا وأنقله لمستشفى تليق باسمه وتاريخه وقيمته لأن مينفعش اللي يحصل معاه دلوقتي من إهانة وإهمال على يد زوجته".

تعقيب زوجة حلمي بكر

من جانبها، عقبت سماح القرشي: "لازم حد يقنعه إنه يروح مستشفى وابنه يشرف وينور وياخده يعالجه في أي مستشفى".

من جانبها، قالت الفنانة نادية مصطفى، عضو مجلس نقابة المهن الموسيقية: "الموسيقار حلمي بكر ليس فقط قيمة وقامة فنية عظيمة لكن بالنسبة لي عشرة عمر وبعتبره أبويا وأخويا وصديق عائلة وطول عمره كان بيدعمني فأنا أدين له بالفضل".

بداية تعب حلمي بكر
 

وأضافت خلال مداخلة هاتفية ببرنامج "كلمة أخيرة" الذي تقدمه الإعلامية لميس الحديدي بقناة "أون": "في فترة تعب حلمي بكر الأولى في المستشفى كنت أزوره وأطمئن عليه لحد لما خرج وبقى زي الفل وراح على بيته في حدائق الأهرام لأنه وقتها كان منفصل عن زوجته وبعد كده عرفت إنه رجع لزوجته وراح على بيته في المهندسين في وجود زوجته وكنت كل يوم بزوره، وكان وقتها تعبان جدا ومش بيتحرك ونقلت الصورة للفنان مصطفى كامل نقيب الموسيقيين وكل مجلس النقابة أجمعوا إنهم تحت أمره، ونعمل كل ما يحتاجه".

واستطردت: "عرضت على الأستاذ حلمي بكر يروح المستشفى فرفض وقال لي خرجت من البيت مش هاعرف أدخله تاني واحتراما لرغبته وإنه مش حمل مشاكل طلبت له دكتور وجاء زاره في البيت وعمل له الواجب بس كل يوم كنت بشوف حالته بتتدهور عن اليوم اللي قبله".

فقدان الذاكرة وتدهور حالة حلمي بكر
 

وتابعت: "ذاكرته راحت ولما حسيت إنه مبقاش يركز في أيامه الأخيرة وإنه بيقول كلام غريب قلت للفنان مصطفى كامل واتفقنا مع الأستاذ حلمي بكر على نقله لمستشفى القوات المسلحة ووافق، ولما تواصلت مع زوجته قالت لنا هو خلاص جاله أمر علاج على نفقة الدولة وأفاجئ بأنها أخدته عند مامتها على البلد واتصلت بها أكتر من مرة مش بترد عليا وكل ده علشان عايزين نطمئن عليه ويكون فيه رعاية صحية له افضل، وده أول صدام بينه وبين زوجته".

بكاء نادي مصطفى بسبب حالة حلمي بكر 
 

وأكملت باكية: "مش قادر يتحرك من مكانه ومفيش بإيديا حاجة أعملها وكل لما أتصل بزوجته مش بترد فكنت هتجنن فتواصلت مع ناس قريبين منه ولقيت حد قريب من مامتها فصعب عليهم الأستاذ حلمي بكر لإنه كان بيتعامل معاملة فيها إهانة، وجسمي كله بيتنفض لإن الأستاذ بالنسبة لنا أبويا وأخويا وصديقي وكنت بفتح التلاجة في بيته، وميهونش عليا أبدا إنه يتهان في آخر أيامه، وآخر مرة شوفته من شهر وزوجته مش سامحة ليا إني أروح، وأنا عايزة أروح له أو أي حد يروحله علشان نطمئن عليه بس مراته بترفض زيارتنا وسمعت كلام من أقارب مراته إنه بيعامل معاملة سيئة".

تعليق زوجة حلمي بكر

من جانبها، ردت سماح عبد الرحمن القرشي زوجة الموسيقار حلمي بكر: "مسموح لأي حد يزوره ولم نمنع أحد من زيارته، واخواته كانوا هنا في الشرقية، وكبار البلد كانوا عايزين ياخدوه معاهم بس هو رفض، هو كان في القاهرة نايم بقاله 3 شهور طريح الفراش ومحدش جاء زاره".

وتابعت: "قلت للأستاذ حلمي بكر دلوقتي بيقولوا انك مخطوف وبتتعذب، فرد على وقال لي هو أنا عيل صغير ولا انتي عيلة صغيرة ومترديش، ولو انا كنت ضربته وجيبلته زمان بلطجية وبعامله وحش مكنش رجع البيت تاني".

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.