ساخرون.. غراب البين يكتب: شحاتين السوشيال ميديا
بعد يوم طويل من اللف والدوران والمرازية فى خلق الله.. قررت أريح جتتى ساعتين.. فوقفت على فرع الشجرة وانكمشت بين أجنحتى.. وقبل أن أغمض عيناى سمعت صوت ضحكات تأتى من المقهى أسفل الشجرة.. شابان وفتاة ينظرون لشاشة موبايل أحدهم..
الفتاة تؤكدا أنها ترى هذا البوست كل شهرين تلاتة من نفس السيدة صاحبة بروفايل نسمة ربيع.. وفى كل مرة لها حجة تختلف عن سابقتها.. حيث يقول البوست هذه المرة "محتاجه 300 جنيه عشان اجيب أكل لأولادي.. اللي يقدر يساعدني كثر خيره"
أحد الشباب يقول أنا بشوف من دا كتير.. حاليا الفنانين أصبحوا بيشحتوا على التيك توك وطول الليل بيعملوا تحديات ومافيش على لسانهم غير "كّبس كّبس".. واللى مش لاقى شغل فى السينما بيطلع يشحت عالتيك توك
الشاب الثانى يحلف 100 يمين إن شحاتين السوشيال ميديا أصبحوا أكثر من الشحاتين اللى فى الشوارع.. لأ وكمان بيكتبوا أرقام تليفونات كاش للى عايز يبعت. أما الفتاة فاقترحت على الشباب أن يقوموا بعمل أكاونت وهمى ويطلبوا مساعدات من رواد السوشيال ميديا.
وهنا وقفت على قدمى وفردت أجنحتى وأخذت أنعق بأعلى صوتى "قاق قاق" فراح الشباب يهشوننى ويقولون لى غور من هنا يا غراب البين جبتلنا النكد والفقر.. فهربت مسرعا ولسان حالى يقول: بقا أنا اللى جبتلكم النكد والفقر يا شوية بنى آدمين أم أنكم من تنكدون على أنفسكم وتستسهلون المكسب وبعضكم ينصب على بعض مستغلين وسائل السوشيال ميديا.
ياخى جاتها ستين ألف نيلة اللى عايزه تخلف بنى آدمين زيكم بيتفننوا فى اختراع أساليب للشحاته والنصب واستسهال الرزق.
