قنديل أم هاشم

أحييكم من مجلس الوزراء وإليكم هذا الخبر المهم الذى صرح به قنديل البحر لمحرر "هريدى نيوز" الذى قال: إن حادث البدرشين لا يستدعى استقالتى أو محاسبة الوزير، ويؤكد محررنا أننا لم نطالبك بالاستقالة، ماهو إحنا أصلاً مش حاسين بوجودك ولا وجود الوزير بتاع القطارات، لكن اعلم ياقنديل أم هاشم أنك فى نهاية الفيلم اللى قام ببطولته شكرى سرحان تم تحطيمك، وحتى زيت القنديل اللى كنا زمان بنقول عليه بركة انكب واتدلدق تحت أحذية المصريين، وكل قنديل مش هينور للغلابة هايكون مصيره هو مصير قنديل أم هاشم، ويرجع تانى محررنا للدم اللى سال، وخط على الأرض قال: دى التالتة ورقم تالت مش فال، لأنها تابتة ونهاية المحتال، وكل نقطة دم لها بينا وصال، وياللى ناديت فى حريق قطر الصعيد بالحكومة تنشال، إما يكون المبدأ ثابت أو مافيه كلام ينقال، وهتخرج من العروبة على نعوش متشال، وندر عليا ما يزفك إلا مزمار أخونا متقال.. وعجبى