غادة عبد الرازق عن سر زواجها في سن صغيرة: كنت هموت وعايزة أتحرر (فيديو)
غادة عبد الرازق، قالت الفنانة غادة عبد الرازق: "اتجوزت صغيرة مش مضطرة طبعًا كانت عقدتي إن نفسي أخرج، وكنت بشوف يسرية أختي بتخرج علشان مخطوبة فأنا كنت هموت وعايزة أخرج، أبويا كان قاسي علينا خالص وأمي كانت قافلة عليَّ حتى بعد وفاة أبويا، نص حكاية الجواز حب والنص التاني إني أتحرر وأخرج".
قصة الزيجة الأولى لغادة عبد الرازق
وأضافت: "طليقي بابا روتانا بنتي كان مع يسرية أختي في الجامعة فرحت مرة عيد ميلاد معاها، فهو شافني واتكلم معايا فلاقاني البنت المناسبة فقفش فيَّ وأنا قفشت فيه علشان أخرج روتانا بنتي اتولدت في مصر بس هي سعودية علشان والدها سعودي، ولما اتجوزت عشت في جدة 5 سنين بس كنت بروح واجي وأمي الله يرحمها كانت بتيجي تقعد معايا.
وقع قرار طلاق غادة عبد الرازق على والدتها
وتابعت غادة عبد الرازق: "قرار الانفصال أول خبطة لأمي إني هتطلق وأسيب بابا روتانا وبعد لما اتخانقنا كانت هي بتصلي برة ولما طلعنا نجري لقينا ماما أغمى عليها ووقعت على الأرض، وأكبر حاجة كانت مضايقاها بنتي روتانا وكانت تقول لي هياخد روتانا فكنت بقول لها روتانا لأ، بس الطلاق كان سلس وقال لي مش أنا ولا عائلتي اللي نحرم أم من ابنتها".
بداية تمثيل غادة عبد الرازق
وأشارت خلال لقائها ببرنامج "معكم" الذي تقدمه الاعلامية منى الشاذلي بقناة "أون": "التمثيل ما كانش في دماغي كنت عايزة أبقى مشهورة وخلاص، والكارثة في الأول بالنسبة لماما قلت لها أنا رايحة أغني فقالت لي هتغني في الكباريهات، والقصة بالنسبة لي إني كنت برقص قدام المراية ما كانش عندي غير موهبة الوقوف قدام المراية، وأول حاجة عملتها في حياتي كانت تجربة مسرح ووقفت على مسرح الدولة لما أخدت قرار التمثيل".
مسلسل الحاج متولي
وأضافت: "دور نعمة الله مع الحاج متولي كان الفنان نور الشريف اللي مرشحني وقعدت أقول يا نهار أسود الدور كبير جدًّا، وما كنتش هوافق على الدور، ولكن في بروفة التربيزة طول الطريق كنت عمالة أفكر أقول لنور الشريف مش هعمل المسلسل إزاي وكل شوية يقول لي اقرأي يا غادة أقول تمام يا أستاذ وما قدرتش أقول له من كتر احترامي وخوفي منه إني بعتذر، وقبل التصوير بأسبوع نزلت اشتريت باروكة الدور بتاع المسلسل".
مسلسل زهرة وأزواجها الخمسة
ولفت: "زهرة وأزواجها الخمسة أقرب مسلسل ليَّ".
غناء غادة عبد الرازق
وغنت الفنانة غادة عبد الرازق: "اتدلع يا عريس يا أبو ضحكة نايلون"، بعد رفضها الحديث عن اسم الممثل الذي ترفض التمثيل معه.
وأشارت: "تجربة الفوازير اللي عملتها مع محمد خان كانت فاشلة وكنت لما اتفرج أقول اقطعوا على الاذاعة، مش انا شريهان اللي اعمل الفوازير".
ونقدم لكم من خلال موقع "فيتو"، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار ، أسعار اليورو، أسعار العملات، أخبار الرياضة، أخبار مصر، أخبار اقتصاد ، أخبار المحافظات، أخبار السياسة، أخبار الحوادث، ويقوم فريقنا بمتابعة حصرية لجميع الدوريات العالمية مثل الدوري الإنجليزي، الدوري الإيطالي ، الدوري المصري، دوري أبطال أوروبا، دوري أبطال أفريقيا، دوري أبطال آسيا، والأحداث الهامة و السياسة الخارجية والداخلية، بالإضافة للنقل الحصري لـ أخبار الفن والعديد من الأنشطة الثقافية والأدبية.
