ساخرون.. غراب البين يكتب: عيد ميلادى

 يوم 26 سبتمبر من سنتين أنا اتولدت.. وكان مولدي هنا.. وفى “فيتو” سكنت أخرج ليل نهار.. وحياتى مقضيها طيار.. وفى آخر الأسبوع أجيب لـ الساخرون أخبار أنا الغراب قاق قاق.. مش هسكت ولا هبطل نعاق.. من شجرة لشجرة ومن بيت لبيت هلف براحتى وأبدًا ما هنساق هتلاقينى فى الخرابات وقدام أفخر المولات.. براقب بلاوى البنى آدمين بعيونى.. 

علشان كدا بيتشائموا منى وبيكرهونى.. وكل نعقة تخرج من حنجرتى بكون شايف بلاوى زبونى وهنا وفى هذه المساحة بقالى سنتين.. بكتبلكم بريشة من الجناحين.. عن كل اللى بشوفه قدامى من بلاوى البنى آدمين.. سواء فى القاهرة أو حتى فى البدرشين.. وأهى حاجة أسلى بيها وقتى بدال ما أنا مقضيها نعيق فى الشوارع عمال على بطال وأنا عارف إنكم مش بتتشائموا منى لما بتقرأولى.. زى ما بتتشائموا منى وأنتم بتشوفونى.. 

علشان أنا هنا بحاول اتعامل معاكم وكأننى بنى آدم.. ماهو ياما بنى آدمين بيتصرفوا تصرفات غربان.. وأنتم راضيين بوجودهم حواليكم.. عموما كل سنة وأنا طيب وقضيت معاكم أحلى سنتين.. بس أرجوكم بلاش تقولوا عنى “غراب البين”.. لأنكم بيا ومن غيرى دايما متفرقين.. وأمنيتى أشوفكم فى يوم متجمعين.. وعلى رأى واحد متفقين.. وكل عام وقرائى المحترمين كلهم طيبين!!