مجدى أحمد على عن تغريب اللغة العربية: إحنا رايحين فى داهية بسبب الفشخرة
حذر المخرج مجدى أحمد على، من خطورة تغريب اللغة العربية، وتعمد استبدال الكلمات والمفاهيم العربية باللغة الإنجليزية بدعوة الثقافة والإرستقراطية والفشخرة.
كتب المخرج مجدى أحمد علي، عبر حسابه الشخصي بموقع التواصل الإجتماعي فيس بوك، قائلا:" يعني لما واحدة تحب تشتري فستان أو چيبة لازم تقول dress و skirt ومينفعش تقول غير shoes لكن لو قالت جزمة تبقى كده فلاحة ولو قالت حذاء الناس تبرقلها، والجاكيت الشتوي بقي إسمه coat ولو قالت معطف الناس هتقولها إنتي جاية من عصر فجر الإسلام، ولو كتبت أنف بدل مناخير الناس هيتريقوا عليها، إنما لو قالت nose هتبقى من الطبقة الأرستقراطية !!
مجدى أحمد علي: تغريب اللغة العربية شيئ مخيف
واستكمل المخرج مجدى أحمد علي، قائلا: آخر حاجة لقيتهم عاملين إعلان على مخدة ومسمينها (( كوشن )) ومعاه صورة مرفقة تعرفك يعني إيه الكوشن، المخدة بنت سلطح باشا بقى إسمها كوشن ومحدش يقول عليها مخدة عشان منفكرهاش بماضيها الحزين !!
تقعد مع طفل تلاقيه بيقولك الـ juice و lunch box وفي grade 2 و class و school والـ garden ومش عايز يبقى naughty وهلم جرا..
ولو قلت شوكولاتة أبقي Low class، لازم أقول شوكلت علشان أكون راقي ومتعلم و civilised !!
أنا مش فاهم إيه المشكلة في اللغة العربية بصراحة، المطاعم بقت تنزل قايمة الطعام بتاعها كلها إنجليزي وكأن اللغة العربية بقت تجلب العار وبتحط من قيمة المكان، تيجي تطلب الأكل لو قلت مكرونة بدل باستا أو سلطة بدل salad أو الحلو بدل dessert تلاقي الجرسون المصري وأبوه وجده وسواده ولونه مصري بيبصلك بإشمئزاز، والجروبات إللي عاملينها مصريين وعرب وتلاقي قواعد الجروب مكتوبة إنجليزي، والمحلات إللي بقت ستورز بقدرة قادر وبتنزل تفاصيل منتجاتهم بالإنجليزي فقط مع إن زباينهم مصريين، الناس نسيت أصلها وعقدة الخواجة بدأت تطول الكل !!
الواحد معندوش مشكلة في فهم بعض كلمات الإنجليزية المشكلة دلوقتي التوجه العام لإستبدال كلمات عربية بإنجليزية لمجرد الفشخرة الفارغة، وإنه بعد كده هيبقى فيه جيل صاعد مش عارف معني الكلمة بالعربي أصلًا ناهيك إنه كده بنخلق جيل مشوه فاقد الهوية لا عارف لغته الأم كويس ولا عارف يبقى خواجة !!
فوقوا إحنا كده رايحين في داهية وغالبًا مش راجعين
ياريت نعيش عيشة إللي خلفونا يا جماعة اللغة العربية بكل فخر هي أعظم لغات الارض..!! "
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
