«توك توك» مع مرسي!
عندما قالت أجهزة الإعلام أن مفوضية الاتحاد الأوربي كاترين آشتون طلبت زيارة المعزول مرسي.. وكان لها ما سألت هاجت منظمة «توك توك» بلا حدود وطلبت المعاملة بالمثل على اعتبارها أولى من الأجانب الذين يفوزون باللقاء دون غيرهم ، وبطريقة وأخرى نجحت منظمة «توك توك» في الوصول إلى مرسي وجرى هذا اللقاء الحار في ظرف استثنائى.
مرسي: إيه ده.. عرفت تيجى إزاى هنا ياتوك توك؟
توك توك: اللى يسأل مايتوهش ياسيادة الريس
مرسي: الله عليك بتقولى ياريس بعد كل اللى جرى!
توك توك: ريس وسيد الرياسة كلها..أنت أول واحد يجيب سيرة التوك توك على لسانه ويعاملنا معاملة الفور باى فور
مرسي: ما تعرفش أنا مبسوط قد ايه بالزيارة دى؟
توك توك: المهم العمة تمام والأكل حلو والقومة مرتاحة
مرسي: لكن داهشنى الحاج بديع؟
توك توك: بديع الزمان؟
مرسي: لا: بديع المرشد أنت مشد واخد بالك ولا إيه!
توك توك: تأمرنى ياباشا.. أنا ممكن أجيب لك رابعة كلها عندك هنا
مرسي: جدع وتعملها.. عارف أنا لو كملت في الرياسة كنت ناوى أخلى التوك توك.. حاجة تانية!
توك توك: ما ترجع ياباشا أنت أيامك بالنسبة لنا.. كانت أيام عز.. لاحد بيسألنا رايحين فين ولا جايين منين!
مرسي: يعنى عايزنى ارجع!
توك توك: ياريت.. والنهاردة قبل بكرة ياعسل
مرسي: بس أنا دلوقت معزول!!
توك توك: فرصة ياباشا.. في الأيام المفترجة تلبس الجلابية وتمسك المصحف.. وتقعد على سجادة الصلاة وتقول يارب.. لكن معلهش في السؤال هو سيادتك بتصلى التراويح مع مين؟
مرسي: مع نفسى
توك توك: تحب سيادتك تيجى نصلى معاك ونرجع!
مرسي: بلاش.. أحسن المرور يعملها معاكم
توك توك: مرور إيه يارئيس.. الكام ده.. ملوش عندنا قيمة
مرسي: طيب أنا عايز منكم خدمة صغيرة
توك توك: ياسلام.. كفاية تشاور بأصغر صباع عند سيادتك وأنت ما شاء الله تملك الصوابع.. إيه هي الخدمة!
مرسي: تحطوا صورتى على كل توك توك
توك توك: ونشيل صورة «أبو تريكة»؟!
مرسي: أظن صورتى أنا أهم؟
توك توك: بس يعنى
مرسي: فيه إيه.. اتكلم!
توك توك: أصل بصراحة قبل ما نجيلك عدينا على وزارة الدفاع وحطينا صورة الفريق السيسى!!
