كامل الوزير يكشف كواليس أزمة نقابة المهندسين (فيديو)
كامل الوزير، أعلن المهندس كامل الوزير وزير النقل، انتهاء ازمة نقابة المهندسين، وانتخاب هيئة مكتب جديد للنقابة مساء اليوم، كاشفا كواليس جديدة في الأزمة.
كامل الوزير يرد علي الانتقادات الموجهة له في ازمة نقابة المهندسين
وقال كامل الوزير خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم":"احد اللي عاملين نفسهم إعلاميين بارزين وقاعدين في تركيا بينظر، ويقول هو ده خريج الكلية الحربية ماله ومال نقابة المهندسين، ميعرفش انه شرف وفخر ليا اني اكون خريج الكلية الحربية، بس انا خريج الكلية الفنية العسكرية وكنت مديرا لسلاح المهندسين، ورئيسا للهيئة الهندسية للقوات المسلحة، انا ابني خريج الكلية الحربية، واخويا خريج الكلية الحربية، وعظام مصر وقادتها خريجي الكلية الحربية، انا مهندس زي كل مهندسين مصر من اوائل دفعتي بالكلية الفنية العسكرية".
وتابع كامل الوزير:"انا عندي 65 سنة ومن كبار المهندسين سنا، بلاش شغلا، وفي 2014 انتخبت المهندس طارق النبراوي ضد الإخوان المسلمين، وفي 2018 انتخبت المهندس هاني ضاحي، وفي 2022 انتخبت المهندس هاني ضاحي، والمهندس طارق النبراوي بقى نقيب للمهندسين وهنأته، واستقبلته في مكتبي مرتين وقلت له الأهم مصلحة النقابة".
اهتزاز صورة المهندسين
وأضاف:"لما لقيت حصل هرج ومرج وبلطجة خلال الانتخابات الأخيرة لنقابة المهندسين أيا كان مين السبب فيها لأن الأمر قيد التحقيقات، كان لزاما على التدخل بعد لما صورة المهندسين اهتزت وسيرتهم علي كل لسان لإني مهندس منهم، وقعدت مع المجموعة كلها".
حياد كامل الوزير في ازمة نقابة المهندسي
وتابع:"فيه ناس قالوا اني مش محايد وهجبر طارق النبراوي علي الصلح مين قال لكم كده، محدش يعلم ما يدور فمحدش يتكلم، المهندس كامل الوزير كان زمان مهندس في سلاح المهندسين، دلوقتي مهندس في وزارة النقل، علشان محدش يقول اصل دول عصبة، أو شلة الجيش مفيش كده، محدش يقول لا دول بتوع الحكومة أو بتوع الحزب الفلاني، كلنا مهندسين، المهندس طارق النبراوي مهندس وطني مصري صميم بيحب وطنه وأول لما طلبته في التليفون جالي وقعدنا وحلينا واتفقنا والطرف الاَخر أول لما كلمتهم قالوا يا فندم استقالتنا قدامك اهو لو انت شايف اننا غلطانين فقلت لهم انتوا فعلا غلطانين انتوا اكبر من التصويت علي سحب الثقة انتوا رايحين تخدموا زمايلكم مش رايحين تقبضوا مرتب ولا تاخدوا مكافأة، انتوا متربيين في مؤسسة محترمة سواء اللى كانوا في الجيش او الشرطة، هما مجموعة تاَلفوا وبقوا مع بعض، وأول لما قلت لهم ان الناس كلها حاسة انكم ضد المهندس طارق النبراوي وشايفين انكم سبب المشاكل في النقابة قدموا استقالتهم كلهم".
التيار المعارض لطارق النبراوي
وأكمل:"المجموعة المعارضة لطارق النبراوي كلهم متربيين محترمين، منهم اللواء الدكتور حسام رزق، واللواء يسري عبد الله رئيس هيئة الابنية التعليمية، واللواء ايهاب خضر رئيس الهيئة القومية للشرب والصرف الصحي، كلهم قامات تنفيذية بتحب بلدها، ايضا المهندس طارق النبراوي قامة هندسية محترمة".
تدخل كامل الوزير لحل ازمة نقابة المهندسين
ولفت:"قعدت 5 ايام للساعة 2 بالليل وكان فيه توجيه ان ازمة نقابة المهندسين لازم تتحل واتدخل علشان دول زمايلك، وبذلت مجهود كبير لإن النقابة مقدرة وكبيرة وهي اللى بتنبني المشروعات القومية ومصر الجديدة، وكلهم اتفقوا وبعد استقالة 6 من هيئة المكتب واليوم الساعة 4 في عرس ديمقراطي تم اختيار 6 مهندسين جدد ضمن هيئة المكتب".
وعد كامل الوزير لحل أي مشكلة في مصر
وأكد:"أي حتة في البلد مش نقابة المهندسين فيها مشكلة هتدخل واحلها، انا مقولتش لحد اسحب البلاغات نتيجة البلطجة والخناقات النيابة تاخد فيها مجراها وهي حرة واتخاذ الاجراء ضد الفاعل، وانا بدعو كل زملائي من المهندسين بتغليب مصلحة المهندسين العامة علي المصلحة الشخصية والتسامح وبدعوهم يسحبوا البلاغات ولكن مش نقفل موضوع البلطجة ".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
