سفير كوريا الجنوبية يودع المصريين بكلمة عامية: شعب جميل وذكي حزين عشان هسيبكم
وجه سفير كوريا الجنوبية فى مصر، هونج جين أووك، كلمة وداع مؤثرة للشعب المصري تزامنا مع نهاية فترة عمله وعودته إلى وطنه، عكست مدى عشقه لمصر وشعبها.
كلمة وداع سفير كوريا الجنوبية في مصر
استهل السفير الكوري الجنوبي هونج جين أووك، كلمته بالقول: السلام عليكم. أنا هونج سفير كوريا الجنوبية في مصر. أتَمَنَّى تكونوا بخير.
وتابع: أنا حاسس إنِّي وصلت القاهرة وسَلِّمت عليكم امبارح بس عَدّى حوالي تلت سنين الوقت بيعدي بسرعة. مش كده؟ عشان كده مش مِصَدَّق إني خلاص بَوَدَّعكم دلوقتي، كنت مبسوط جدا طول التلت سنين اللي فاتت.
واستطرد: الكورونا والمشاكل الاقتصادية مقدروش يُقَفُوا في طَرِيق صَداقة مصر وكوريا بالعكس بَقِت العلاقات بينهم أحسن.
وأضاف: أكيد بسبب حرب أوكرانيا كان فيه مشاكل اقتصادية في البلدين، لكن بالعكس السنة اللي فاتت التجارة بين مصر وكوريا زادت حوالي أربعين %، وكمان التصدير من مصر لكوريا زاد حوالي مية واحد وستين في المية.
وأكمل: قبل كده البلدين عملوا مُنْتَجات made in Egypt زي التليفزيونات والغسالات، والسنة اللي فاتت قرروا يعملوا تابات وموبايلات وميترو. وكمان قرروا يعملوا محطة الطاقة في الضبعة
وقال: في شهر أغسطس اللي فات بعدما تم رفع التَحْذِير السِياحي من مُعظم الأماكن، كوريين أكتر بَقوا بيجوا مصر للسياحة، وكمان أظن إن هيكون فيه طيران مُباشِر بين كوريا ومصر قريب. كمان دلوقتي كوريين كتير بيستعِدَّوا للسفر لمصر عشان يشوفوا الطبيعة الجميلة زي الغردقة وشرم الشيخ ودهب مش بس الأماكن التاريخية زي الأهرامات والأقصر وأسوان. غير كده كمان في كوريين كتير بيتعلموا عربي، وكمان عدد الكوريين المسلمين والمساجد بيزيد كل شوية.
السفير الكوري يوجه رسالة وداع للمصريين
السفير الكوري الجنوبي أضاف فى كلمته التى ألقاها بالعامية المصرية: عدد المصريين اللي بيحبوا الثقافة الكورية زي اللغة الكورية والدراما والأفلام والأكل الكوري بيزيد كتير. غير كده بدأ تدريس اللغة الكورية في جامعة سوهاج وكفر الشيخ مش بس في جامعة عين شمس وأسوان. وكمان عدد طلاب معهد سيجونج زاد أكتر من عشر أضعاف.. عدد المشجعين المصريين لفرق الكيبوب بقى أكتر من مليون مُشجع. كمان عِرفت إن اِتعَمَل جروب على الفيسبوك باسمي للناس اللي بتشجعني. عشان كده دايما بقول إني أسعد سفير كوري في العالم.
واستطرد: خلال الـ 3 سنين اللي فاتوا حَصَلت حاجات كتير، مثلا رئيس كوريا ورئيس البرلمان الكوري زاروا مصر. والسنة اللي فاتت كان فيه اِتِصَالات تِلِيفونية ورَسَايِل كِتير بين الرئيس السيسي ورئيس كوريا الجديد (يون). وكمان وُزراء وصحفيين كتير من البلدين سافروا كتير بين مصر وكوريا وعَملوا مَجهود كبير عشان يِسَاعْدوا التعاوُن بين البلدين
وتابع: أكتر حاجة أنا فخور بها إن الكوريين والمصريين اللي موجودين هنا بِيعَامْلُوا بعض باحتِرام، وبيتمنُّوا إن البلدين يتطوروا سوا في المستقبل.
وأضاف: زي ما بقول دايما، حتى لو الحكومات اتغيرت الشعب واحد مبيتغيَّرش. عشان كده أنا شايف إن الشعب هو أهم حاجة.. لازم نِفْهَم ونِحْتِرم ثقافات بَعْض حتى لو كانت مُختلفة. ده سبب إني اِهْتَمِّيت بالدبلوماسية العامة أكتر من أي حاجة طول الفترة اللي فاتت.
مصر شعبها ذكى وبلد لها تاريخ عريق
ووصف مصر بأنها بلد جميل، قائلًا: لها تاريخ عريق ومستقبلها هيكون مشرق، مصر دولة كويسة لكن مُتأكِّد إن مستقبلها كمان هيكون بَاهِر عشان عندها شباب ذكي زيكوا. وأظن إن مصر هتكون واحدة من الدِول الموجودة في مجموعة العشرين قبل سنة 2050.
وتابع: زي ما بيقولوا إن اللي يشرب من نيلها لازم يرجع له تاني، فأنا مُتَأكِّد إني هرجع لمصر تاني قريب.. ومتأكد إن مصر هتكون أحسن وأجمل لما أرجعلها.
وختم: أنا حزين عشان هسيب مصر لكن عارف إن السفير اللي هيجي بعدي هيحب مصر وشعبها، وأتنمى أنكم تِفْضَلوا تحبوا كوريا وإن العلاقات بين مصر وكوريا تتحسن أكتر وأكتر، أتمنى إنكم تفضلوا بصِحَّة وسَلامَة وإن شاء الله أشوفكم قري، شكرا ليكم وبحبكم كلكم. مع السلامة.
نقدم لكم من خلال موقع (فيتو) ، تغطية ورصد مستمر علي مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
