زينة: محمد سامي مكنش عايزني في جعفر العمدة ومش هشتغل معاه تاني (فيديو)
قالت الفنانة زينة: "المنتج محمد السعدي هو اللي أقنعني أشارك في مسلسل جعفر العمدة، وأشكره على ترشيحي وبقوله أنا عملت اللي عليا".
نجاح مسلسل جعفر العمدة
وأضافت خلال لقائها ببرنامج "حبر سري" الذي تقدمه الإعلامية أسما إبراهيم بقناة "القاهرة والناس":"الحمد لله مسلسل جعفر العمدة نجح وهو نمبر وان في الأعمال الدرامية في رمضان".
موقف محمد سامي من زينة
وأوضحت زينة: "لما أنا مكنتش موافقة على مسلسل جعفر العمدة، وقتها محمد سامي قال لي أنا عارف أن مكانتك أكبر من كده وجاية من نجاح وبقولك اعتذري ومتعمليش حاجة أنتي مش مقتنعة بيها ومش هزعل لو اعتذرتي، وكان عايزني أعتذر بأي شكل لأنه كان عارف إني مترددة فهو مكنش حابب التردد ده".
سر غياب زينة عن سحور مسلسل جعفر العمدة
وأشارت:"مروحتش سحور مسلسل جعفر العمدة لأني كنت بعمل عمرة، والسحور مكنش للمسلسل ولكن كان لمجموعة المسلسلات اللى عاملها محمد السعدي، وده كان سحور الشركة، ولو كنت في مصر أنا مبحبش أخرج في رمضان وبصدق أكون مع ولادي، ومعنديش نقطة خلاف مع محمد سامي ولكن مش هشتغل معاه تاني".
في اللقاء نفسه، قالت الفنانة زينة: "الناس اللي وقفوا مع أبو ولادي في الأزمة مبقوش موجودين دلوقتي ومش سامعة صوتهم دلوقتي، وبعدين دي مشكلة شخصية بيني وبين أحمد عز، وكبِرت لأننا معروفين".
رسالة قوية للفنانة زينة عن أزمتها مع أحمد عز
وتابعت:"محدش ليه أنه يتدخل ولا يتكلم في مشكلتي أنا وأحمد عز لأن في الآخر ما بينا ولاد وأي حد داخل بينا خارج في الآخر، وهيلف الزمن والمواقف وأنا لو وقعت في أزمة أكيد هيجي يقف معايا علشان ولادي وأنا لو لقيته في أزمة هكون أول واحدة تجري عليه وهو راجل كويس ومحترم ومتكفل بولاده وكويس جدا مع ولاده، وياريت محدش يتكلم عن موضوعنا وهو شخصي وعيب حد يتكلم فيه واحنا الاتنين كويسين".
زينة تكشف عن إمكانية عودتها لـ أحمد عز
وعن إمكانية العودة لأحمد عز، أكدت زينة:"لكل واحد وواحدة بيتكلموا علينا أنا وأبو ولادي أحمد عز بقولهم أنتم مين؟ ملكوش دخل بيني وبين أبو ولادي، إحنا حرين ناكل بعض هنتصالح نقطع بعض فيه بينا ولاد ملكوش دعوة، هو راجل محترم وأنا ست محترمة ومحدش يتدخل في حياتنا".
موقف زينة من الزواج
وأكدت:"أنا مش كارهة الجواز ولا الرجالة، بس انا معنديش الرفاهية أني أحب وأخرج ومعنديش حاجة اديها لشخص لأني وقتي كله وحياتي منصبة علي عيالي وشغلي، اللى هيجي لا هياخد اهتمام ولا حب ولا وقت فحرام اظلم واحد معايا".
حب زينة لـ أحمد عز
ولفتت:"جربت حظي في الخطوبة والجواز، أنا بحب ولادي وأكيد كنت بحب أبوهم ومقدرش اقول غير كده علشان ولادي مش هيسامحوني وعلشان خاطر ولادي أعمل أي حاجة في العالم بس هما يأمروا".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم، أسعار الدولار، أسعار اليورو، أسعار العملات، أخبار الرياضة، أخبار مصر، أخبار الاقتصاد، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي، الدوري المصري، دوري أبطال أوروبا ، دوري أبطال أفريقيا، دوري أبطال آسيا، والأحداث الهامة والسياسة الخارجية والداخلية، بالإضافة للنقل الحصري لـ أخبار الفن والعديد من الأنشطة الثقافية والأدبية.
