"نوارة": حمدين والبرادعى فكوا صواميل قطار البدرشين

قالت الناشطة السياسية، نوارة نجم، عبر "تويتر"، اليوم الثلاثاء:"حادثة إيه؟ الله ينكد عليكو حادثة إيه لا أرجوكو ماحدش يقولى حصل حادثة، انا صاحية ناوية ألون على مرسى واستلمه، لا اله الا الله... ماحدش يركب قطارات تانى بقى.. باتكلم جد.. المفروض يوقفوا عمل القطارات خالص، مش نافعة لاستخدام الفراخ حتى مش البنى آدمين".

وأضافت "مجندين من مركزى مجندين جيش مجندين ديلفيرى ماك دونالدز مش ده المهم.. المهم ان القطارات لازم تتوقف لحد ما يصلحوها أو يولعوا فيها ، واحد بيقول احنا نركب قطر ضلمة ومرسى بيركب قطر مكيف هههههههههههههه قطر إيه اللى حيركبه مرسى يا فقرى يابن الفقري.. هم يبكى وهم يضحك".

وأشارت نجم، إلى أن "لجان الاخوان دايرين يقولوا ان الحادث مدبر... يبقى اكيد حمدين والبرادعى فكوا صواميل القطر وزحلقوا القضبان بالصابون"، مضيفة: "الحمامة الزاجلة كان البرادعى باعتها لحمدين بس اقطاى لقاها.. لكن حمدين وصلت له الخطة عن طريق محمود اللى بلع حصان منصور وفك القطر وعمل الحادثة".

وقالت نجم "هم الاخوان دول بنى ادمين؟ مانعين الصحفيين من التصوير عند القطارات ودايرين يقولوا الحادث مدبر.. طب ادونا فرصة نزعل على اللى مات".

وأضافت "احنا فى انتظار قصة تغلب قصة خطف مرسى فى حكاية تدبير القطر.. ويا ريت ما تنسوش ضاحى خلفان فى القصة، له يد برضه فى موضوع القطارات ده اكيد .. ضاحى خلفان بعت حمامة زاجلة لشبرا، شبرا كان فيها احمد شفيق بعت حمامة زاجلة لاسيوط اللى كان فيها عمرو موسى بعت حمامة للبرادعي" .

واستطردت: "ساويرس بعت السواق الخصوصى بتاعه يسوق القطر، حمدين فك الصواميل، اول ما فكها بعت حمامة زاجلة لأون تى فى تيجى تصور، البرادعى كان قاعد على التحويلة، بيكلم ضاحى خلفان فى الراديو اللى معاه، بس ضاحى خلفان كان نايم، شفيق زقه وقاله قوم يا موكوس حنقلب القطر".

واختتمت تغريداتها، موضحة: "القطر اصلا ما يستحملش العدد ده كله، الكرسى اللى يشيل اتنين كانوا حاطين عليه 6.. القطر لو ما اتقلبش يبقى مافيش عند أمه دم" .. مدبر ايه بس؟".