ساخرون.. غراب البين يكتب: بلاها برامج الطبخ في رمضان

بعد يوم طويل من اللف والدوران والمرازية في خلق الله، قررت أريح جتتى ساعتين فأخذتنى أجنحتى حيث مدينة الإنتاج الإعلامى فوقفت على سور المدينة وانكمشت بين أجنحتى وقبل أن تغمض عيناى سمعت صوتا يأتى من أسفل السور لمذيعة تقول لزميلها: باعتبارك رئيس تحرير البرنامج إيه الجديد اللى ممكن نقدمه في رمضان؟! 

فقال لها بكل هدوء: هنقدم كل يوم شكل جديد لسفرة الإفطار.. يعنى يوم تعملى ديك رومى ويوم تانى تعلميهم حشو الحمام والأصناف اللى ممكن تتاكل مع الحمام.. ويوم تالت للمحاشى والبط وهكذا كل يوم مكونات جديدة لسفرة جديدة وبالشكل دا هيبقى عندنا 30 سفرة مختلفة.. 

وهنا لم أستطع الإنصات لباقى الحوار خاصة إنى شايف المذيعة الشيف بتهز دماغها زى اليويو وكأنها مقتنعة بأم الهرى ده.. فوقفت على قدمى ونفشت ريشى وأخذت أنعق بأعلى صوتى “قاق قاق” فراحت المذيعة الشيف تهشنى ومعها زميلها ويقولون لى غور من هنا يا غراب البين جبتلنا النكد والفقر.

فهربت مسرعا قبل أن يحدفوننى بالطوب ولسان حالى يقول: بقا أنا اللى جبتلكم النكد والفقر ولا انتو اللي بتنكدوا على خلق الله؟! يعنى إيه تقدمى كل يوم سفرة جديدة فى ظل الظروف الصعبة اللى بيعيشها معظم الشعب المصرى اللى منتظر اللحمة التشادى تنزل علشان يعرف يشتريلو كيلو يأكله لعياله.

دا أنا كغراب أعلم جيدا أن الناس فى عرض فرخة برازيلى من أم 65 جنيه علشان تفطر بيها فى رمضان.. وأنت كبنى آدم جاى تقول للشيف تقدم كل يوم سفرة وإشى ديك رومى وإشى بط وحمام؟! ياخى جاتها ستين ألف نيلة اللى عايزة تخلف بنى آدمين زيكم لا يشعرون بمعاناة من حولهم.. قال ديك رومى قال!!