نجيب ساويرس: أول مكسب عملته كان من "البلي".. ومش بحب ألمع نفسي (فيديو)
قال رجل الأعمال المهندس نجيب ساويرس: "لو عملت فيلم سينمائي هعمله عن والدي، ودي الحاجة الوحيدة اللى ممكن أعملها.. إنما مش بحب فكرة ألمع نفسي، وعنوانه يبقى ماي لايف ماي رولز".
سر تأجيل مهرجان الجونة السينمائي
وتابع خلال لقائه مع الإعلامية نايلة تويني: "الظروف هي اللى أجلت دورة مهرجان الجونة السينمائي، والناس وضعها مش كويس والمهرجان دايما عليه هجوم غير مبرر وسطحي، وهناك عوائق كتير بتتحط، والحقيقة أنا عن نفسي لقيت الناس في حالة اقتصادية تعبانة دلوقتي ومش وقت نبهرج دلوقتي، وزهقت من الهجوم الموجه".
تعليق قوي لنجيب ساويرس عن أزمة هاني شاكر
وعن أزمته مع نقيب الموسيقيين السابق هاني شاكر، علق: "هو مقتنع إنه بما أنه النقيب لازم نسمع المغنيين اللى بيحبهم، يعني لو هو بيحب فريد الأطرش وعبد الحليم يبقى إحنا لازم نسمعهم، أما حمو بيكا وحسن شاكوش ومحمد رمضان إزاي تسمعهوهم، وأنا بقول له إنت مالك؟! إنت نقيب فنانين ترعاهم صحيا اجتماعيا وتشوف إيه اللى محتاجينه وتطلع التصاريح اللى بتطلعها بالمزاج.. إنما متتحكمش في ذوقي اسمع مين ومسمعش مين".
هل سيقام مهرجان الجونة السينمائية في 2023
وأكد: "إن شاء الله هيقام مهرجان الجونة السينمائي في 2023، بس يكون الوضع في مصر مناسب، بس أخويا ابتدى ياخد دور أكبر فيه".
بداية نجيب ساويرس في عالم البيزنس
وعن بداية تجربة البيزنس، علق: "أنا كنت بلعب بلي في النادي وإحنا صغيرين وكنت بكسب كتير أوي وبعدين أبيعه للولاد وأخد الفلوس وكنت بلعب كويس أوي، وأرجع البيت وأنا طفل عمره 10 سنين معايا 5 أو 10 جنيه وفلوس كتير بكسبها، وقتها بدأت أحس بالعملية بتاعة الربحية، وأول «ديل» عملته في حياتي وأنا بدرس بره، لقيتهم بيبيعوا مجوهرات رخيصة فأنا قلت حاجات خان الخليلي ببلاش، وبدأت أخدها واقعد في الشارع برة مصر، وأنا مسافر الصيف وأقعد في الشارع واحط فوطة سودة ييجي واحد إسباني أبيع له جعران بـ20 فرنك، وهو مكلفني مثلا تعريفة أو قرش، فعملت فلوس كتيرة جدا، وبعدين تطورت وقلت بدل ما أقعد في الشارع وييجي البوليس يقبض عليا علشان مش معايا تصاريح وألم الحاجة وأجري وأخبيها في الأمانات، وفي ألمانيا دخلت الزنزانة ساعتين لأن ممنوع نبيع من غير رخصة، بقيت أخد الحاجة من مصر وأبيعها للمحلات الكبيرة في ألمانيا ومولت دراستي أول سنتين تلاتة بالتجارة دي، وقتها حسيت بعملية التجارة وبعدين والدي كنت ماسك له حاجات البنوك وقت ما كان شغال في ليبيا".
تجربة ترجمة نجيب ساويرس
وأشار ساويرس: "لما رُحت سويسرا كنت بترجم من الألماني للعربي، وشركة بتاعة لغات أعطتني كتابا بالكامل أترجمه فأخدت ترجمته في مصر بـ50 جنيها وأخدت منهم 7 آلاف فرنك".
فترة عمل نجيب ساويرس مع والده
ولفت نجيب ساويرس: “أنا كنت أكبر واحد في أخواتي ولما رجعت من برة قررت أشتغل لوحدي مش مع والدي، واشتغلت لوحدي سنتين مع شريك من سني وكنا بنبيع تكييفات، وكسبنا مبلغ كويس وعملنا شركة مع بعض، ونجحنا نجاح غير عادي، وخلال سنتين ونصف كل واحد عمل ربع مليون دولار، وإحنا عندنا 23 سنة، فجأة لقيت نفسي أغنى واحد في مصر في السن ده، وجيبت لنفسي عربية، وبعد كده والدي قال لي تعالى اشتغل معايا وكان عنده مكتب صغير، فقلت له هشتغل في حاجات تانية وبعدين دخلت على السكة الحديد وبقينا نورد كل حاجة في السكة الحديد وبنبنى خطوط السكة الحديدية، وبعدين دخلت على المقاولات وأخويا الصغير لما رجع خد المقاولات، وبعدين كملت أنا في الـ ”آي تي"، وأخدنا توكيل اتش بي مايكروسوفت، وبعدين عملت أول شركة إنترنت في مصر وبعدين أخدت رخصة موبينيل، وده كانت لعبة بيزنس جديدة".
ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
