نجيب ساويرس: مش بحب لقب رجل أعمال والسياسة متنفعش مع شخصيتي (فيديو)

قال رجل الأعمال المهندس نجيب ساويرس: "أنا مرعوب من فكرة اقتراب عمري من الـ70 عاما، ولكن ولادي دايما يقولوا لي أنت وقفت عند الـ30 مطلعتش من ناحية شباب القلب، وأنا مبحبش فكرة تسليم الراية من منطلق إني كبرت، وأنا أحب أتخلى عن لقب رجل الأعمال لأنه أوحش حاجة وأفضل أبقى فنان أو دي جيه، أو أتخلى عن لقب سياسي".
 

سر ابتعاد نجيب ساويرس عن السياسة

وتابع خلال لقائه مع الإعلامية  نايلة تويني: "أكتر حاجة اكتشفتها في السياسة إنها متنفعش مع شخصيتي، وأوحش حاجة فيها أنها عايزة تنازلات عن المبادئ وطالما هتنازل عن المبدأ لأ أبقى بعيد عن السياسة، ومشيت بعيد عن السياسة لأن معدني هيتغير وأتلوث والحمد لله إني مشيت بعيد عنها".
 

رؤية نجيب ساويرس تجاه المصلحة الوطنية

وأكد: "لو مصلحتي كمصري قبطي تعارضت مع مصلحة مصر هفضل مصلحة مصر حتى لو أنا اتظلمت لو على حساب إن طائفتي تتظلم، بس بلدي تطلع قدام هبقى موافق، عمري ما فكرت أدخل برلمان أو أعمل حزب، أنا مش شجاع ولكن أنا مؤمن".
 

صديق نجيب ساويرس المسلم

ولفت ساويرس: "معظم أصحابي وأصدقاء  العمر مسلمين، واتربيت في بيت أعز صديق ليا زي أخويا وكان مسلم، وكنت بصوم رمضان معاه، أنا تركيبتي معنديش حتة التحيز الطبقي أو الطائفي".

مشكلة المجتمع الشرقي

وتابع: “المشكلة في مجتمعنا متعلقة بالجهل، ودايما بقول بيت شعر ”لو شاء ربك لوحد الأقوام"، فهو لم يشأ، فمتجيش تقولي توجع دماغي وتقولي ليه ده طلع مسلم، محدش اختار دينه، أنا مخترتش ديني طلعت لقيت أبويا واخدني على الكنيسة وأنا مبحبش حد يغير دين حد، وأنا أول ما بصلى بطلب من ربنا يغفر لي ذنب معين عندي مش بقدر أخلص منه.. أيوة عندي ذنب ومفيش حد مننا معندهوش ذنوب".
 

سر نجاح عائلة نجيب ساويرس

وأشار المهندس نجيب ساويرس: "إحنا لو كنت أنا واخواتي منجحناش كان هيبقى وضع غريب أوي لأن المعطيات اللي اعطيت لينا من ربنا المفروض تنجح، أولها نشأنا في أسرة مترابطة متماسكة متدينة وأمي نجحت إنها تحط في الـ3 أولاد محبة الله ومخافة الله علشان منعملش حاجة غلط تزعله، وكانت تاخدنا وإحنا صغيرين في حي الزبالين تمشينا وسط الزبالة والفقراء والناس قاعدة والدبان، وكان يوم الجمعة الوحيد اللى إجازة عندنا المفترض تودينا فيه نادي الجزيرة، ولكن كانت رسالتها علشان لما تكبروا متنسوش الناس دي، وبعدين تودينا الكنيسة ونصلى فدخلت الحتة الدينية فينا، صحيح أنا أقل واحد بصلي في الكنيسة ومبصومش بس ملتزم".
 

نجيب ساويرس معلقا على صورة محمد صلاح وابنته: حبيبنا أبو مكة

نجيب ساويرس يكشف طموحه في الحياة

روشتة نجيب ساويرس للنجاح

وتابع: "والدي من الأول دخلنا مدرسة ألماني لأنه كان معتقد أنهم متقدمين والمدرسة دي كانت لها فضل كبير جدا في التعليم واخدنا تعليم غير طبيعي واللى شكل شخصيتي الفلسفة الألمانية كلها وكنا بناخد فلسفة، وأقول للشباب لازم تبقوا عندكم ثقة في نفسكم، ومتعتقدش أنك ذكاء بس لأن الذكاء وحده مينجحش فلابد من العمل الشديد والمذاكرة الشديدة والعمل لساعات طويلة والشقاء، ومش من أول ما الدنيا تتعقد في وشك تقول جربت.. أنا شخصيا بقعد أنحت في الخرسانة لحد لما أحفرها واعدي، وعلشان كده لازم يبقى فيه مثابرة وصبر وبعدين التعليم الكويس".

ونقدم لكم من خلال موقع (فيتو)، تغطية ورصدًا مستمرًّا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوادث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.