محمد رمضان يكشف سر لبسه الغريب وطريقة احتفاله برأس السنة أيام الكحرتة (فيديو)
قال الفنان محمد رمضان:"دلوقتي بحتفل برأس السنة زمان كنت بتفرج على اللى بيحتفلوا برأس السنة، كان فيه قصر في البحر الأعظم وبيعموا حفلات ونقعد انا وصحابي بعيد نتفرج علي اللى بيحتفلوا ونحس اننا قاعدين معاهم، والإحساسين حلوين زمان كان فيه شعور جميل ودلوقتي جميل جدا، وانا بحب البلطي والجمبري".
سر ملابس محمد رمضان الغريبة
وعن لبسه الغريب خلال لقائه ببرنامج "معكم" الذي تقدمه الإعلامية منى الشاذلي بقناة "سي بي سي"، علق محمد رمضان:"مش في الحقيقة بلبس كده والحفلات بتتطلب جزء من الشو ويبقى فيه بهرجة انما في الحقيقة بلبس بسيط جدا، ولبسي شبه لبس كل الشباب، ومعايا استايلست بيلبسوني في الحفلات ومعايا استايلست نييجري لما يكون عندي حفلة في افريقيا، واستايلست مغربي لما يكون عندي حفلة في المغرب، وفي افتتاح فورمولا 1 كنت لابس لبس السباق، وفي حفلة أمريكا بلبس لبس الموضة عندهم علشان ميبنش ان فيه فجوة".
أغرب بدلة لمحمد رمضان
وعن أغرب بدلة ارتداها، أشار:"كان عندي مؤتمر مع ميتر جينس فقلت للاستايلست النيجيري جابلي بدلة بتاعت تجار الألماظ السنغاليين فمحمود اخويا قاللى لو لبست البدلة لا انت أخويا ولا أعرفك، ولكن أنا أخدت المخاطرة ولبست البدلة علشان اكسب 2 مليون سنغالي، بيكون فيه استراتيجية ممكن الجمهور مبيقدرهاش".
مشكلة أغنية نمبر وان
ولفت: "لما انتقدوا اغنية نمبر وان عذرتهم وحطيت نفسي مكانهم وقلت لو انا مكانهم وحد تاني بيغني نفسي الأغنية هقول مين ابن اللذين ده وهضايق منه طبعا".
قصة محمد رمضان منذ الصغر
وأشار:"حبيت التمثيل من وانا صغير ومش عارف اخدته منين لأن مفيش حد في عيلتنا ممثل ولا له في التمثيل، وأمي لمست من وانا صغير إني بلقط حاجات كتير وبخزنها وبمثلها قدام المراية وقدام اصحابي، أمي كانت شغلها في تفصيل الملابس للسيدات فكان بيجيلها ستات كتير والستات بطبعهم بيحبوا الكلام فكنت بسمع كلام يضحك ويبكي، وكنت بابقى قاعد بذاكر والاقى نفسي عيطت علي واحدة عملت كل حاجة مع زوجها وبعدين يسيبها ويطلقها وياخد اللى حيلتها".
وأكمل محمد رمضان:"المنطقة اللى اتولدت فيها شكلت حاجات كتير فيا، وكنت كل يوم باروح عند قهوة بعرة، ولما اخدت افضل موهوب في المسرح المدرسي على المستوى الجمهورية في أولى ثانوي، روحت للمخرج وقلت له يا استاذ انا عايز اقابل المخرجين اللى بجد بتوع التليفزيون والسينما فقاللي انزل وسط البلد فاخدت منه الكلمة فروحت محطة الأتوبيس وكنت متخيل اني هنزل هلاقي حسين فهمي ماشي والوسط الفني كله متجمع، فبقيت ادخل عمارة عمارة علشان اشوف المخرجين ودخلت وسط البلد عمارة عمارة علشان اوصل لمخرج يخليني أمثل، وأول عمارة كانت فيها مخرج شرائط كاسيت وقاللى عمارة التوفيقية وفيها المخرج السيد راضي، كنت امسك كوز الذرة واتخيل انه أوسكار، وكان عندي حلم وعايز أوصله بأي طريقة، وبسعي وراء شئ جميل بحبه".
وتابع:"كنت بقول لكل مخرج شغلني وظفني وكل اللى انت عايزه انا هاعملهولك لإني كنت مؤمن بموهبتي وعارف حقيقة امكانياتي".
وأشار:"مكنتش بحب اشوف القصص الحزينة، وكنت اشتري كتب السير الذاتية ومنها قصة بيليه وازاي قدر ينجح ويوصل لما وصله وهو مكنش معاه يشتري جزمة".
ونقدم لكم من خلال موقع (فيتو)، تغطية ورصدا مستمرا على مدار الـ 24 ساعة لـ أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا ، دوري أبطال أفريقيا ، دوري أبطال آسيا ، والأحداث الهامة و السياسة الخارجية والداخلية بالإضافة للنقل الحصري لـ أخبار الفن والعديد من الأنشطة الثقافية والأدبية.
