حلال على المعزول حرام على المصريين
جايين مؤيدي المعزول على دعوة السيسي للنزول للميادين تحت عنوان لا للعنف ويقولوا عليها دعوة للاقتتال وبيفتح باب للحرب الأهلية وهاتبقي بحور دم.
يقول المحلل السياسي لوكالة هريدي نيوز: طيب لما مرسي قال انزلوا احموا الشرعية كان يقصد إيه؟!!
ولما هو نفسه المعزول قال: إن المتظاهرين أمام الاتحادية بلطجية كان عايز إيه؟!
ولما أنصار المعزول نزلوا عند جامعة القاهرة وقتلوا 34 مواطن غلبان من بين السرايات كان فوتوشوب ولّا دعوه للهزار؟!!
وفي آخر خطاب له لما قال دونها رقبتي كان بيدعو للتعانق الحار وأحضان الحبايب؟!
وأضاف المحلل السياسي: إن منصة رابعة قالت اللي هينزلوا الميادين يوم 30 يونيو بلطجية وعلمانيين كفرة مكنش إباحة دم ودعوة لقتل المصريين؟!! ولما ذات نفس المنصة اللي في رابعة قالت هنسحقهم بالجزم كان بس مجرد تلطيش؟
وأكد المحلل السياسي: إن نزول الناس للميادين مش بس علشان الإرهاب ولا علشان يوقف دم الغلبان ده مجرد تحذير للأمريكان إن اللي في مصر شأن أصحابها مش للغربان!
