بركات: كنت باخد أدوية محظورة بموافقة الفيفا.. وهذا ردي على أزمة المؤهل العالي
كشف الكابتن محمد بركات عضو مجلس إدارة اتحاد الكرة، حقيقة تعاطيه المنشطات، وكواليس أزمة استبعاده من انتخابات الجبلاية بسبب عدم حصوله علي مؤهل عال.
شائعة المؤهل العالي
وقال "بركات" خلال لقائه ببرنامج "حبر سري" الذي تقدمه الإعلامية اسما ابراهيم بقناة "القاهرة والناس":"أنا كنت قاعد فجأة لقيت مراتي بعتالي حاجة على واتساب فدخلت سمعتها لقيت واحد عامل مداخلة مع الكابتن شوبير فقال إن محمد بركات مش هينفع يخش نظرا انه مش معاه مؤهل عالي، فاستغربت لإني معايا بكالوريوس تجارة عين شمس".
شائعة من داخل اتحاد الكرة
وتابع:"كلمت الشخص مروج شائعة أني مش معايا مؤهل عالي واللى كان بيكلم الكابتن شوبير فقلت له هو إيه اللى بيحصل انا راجل معايا بكالوريوس تجارة فقال لي أن فلان من اتحاد الكرة هو اللى مطلعها وانتهى الموضوع".
حقيقة تعاطي محمد بركات المنشطات
وعن قصة تعاطي المنشطات، قال محمد بركات:"استئصلت الغدة الدرقية وبعد العملية بسنة مأخدتش أدوية لمدة سنة ونص وبعدين تعبت تاني فروحت لدكتور فقالي أنت محتاج دواء فكتب لي دواء آخده مدى الحياة ولما سألنا لقينا إن الدواء اللى باخده محظور فأرسلت للفيفا اني عامل عملية ومطلوب آخد جرعة تخليني بني آدم طبيعي زيي زي اي حد، وحصلت على موافقة".
وتابع:"معرفش مين اللى طلع شائعة اني بتعاطي منشطات، انا باخد دواء علشان ابقى بني اَدم طبيعي والناس اقتنعت بعد سنين من انتشار الشائعة".
