وليد منصور: بكرة "انتش واجرى" يعمل حفلة

تحدث المنتج وليد منصور عن ظاهرة منظمي الحفلات الجدد الذين ظهروا بشكل مفاجئ مؤخرا على الساحة الفنية، بعد حدوث أخطاء كبيرة وسوء في تنظيم بمجموعة كبيرة من الحفلات الفترة الماضية.

وكتب وليد منصور عبر صفحته الشخصية علي موقع التواصل الاجتماعي فيس بوك "زمن انتش واجرى ستايل.. ده اللي بيحصل في عالم الحفلات.. ظاهرة منظم الحفلات المنتشرة بشكل مضحك للأسف كل واحد معاه رقم مدير أعمال أو صديق فنان أو جار حد صاحب فنان أو ابن خالة حد جاره زميل أخو فنان أو مدير أعمال فنان أو شريك  مدير أعمال  بقي يقولك أنا منظم حفلات".

وأضاف: "للأسف الفنان ساعات يكون سبب في إنه يساعد ناس تقول كده على نفسها إن الفنان علشان يضمن الحد الأدنى من نجاح يقول اني هاجي بكل التجهيزات بتاعتي وأنت نظم بقى وفي الآخر الحفل بيكون كله مشاكل الدين والدنيا ويطلع يقولك أنا منظم الحفل. بره مصر وأي دولة منظم الحفلات ده لازم سجل تجاري ومقر وسابقة عمل وحاجات كتير".

وأوضح: منظم الحفل هو اللي بيحجز المكان ويعمل تصاريح ويقعد مع الأمن يعمل خطته الأمنية ويروح ضرائب الملاهي  وهو اللي يرسم شكل المسرح وينظم دخول الجمهور وخروجه وسلامة الجمهور وتوفير الإسعاف والمطافي  وتصوير الحفل وعمل دعاية الحفل وكل تفاصيل الحفل عنده. ده منظم الحفل".

واختتم "عدم خبرة المنظم هي اللي بتظهر لينا ناس غريبة يتعمل ليها حفلات وأخرهم هتلاقي انتش واجرى بكرة بيعمل حفلة".