زينة عن مسلسل "الليلة واللي فيها": "كنت باموت ورحت المستشفى وأخدت أدوية"
قالت الفنانة زينة: "مسلسل الليلة واللي فيها، أول ما قرأته كنت مخضوضة جدًّا وقلت ده هيتعمل إزاي، وقلت إزاي أستحمل المشاهد دي؟!، والكتابة كانت قاسية جدًّا، وكلمت المنتج والمؤلف والمخرج إن المسلسل عاجبني والموضوع جريء، وأنا مش واخدة إني أعمل الأدوار الجريئة دي، ولكن العمل كله هايل".
فرحة زينة
وتابعت خلال لقائها ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "مسلسل الليلة واللي فيها، طلع بالشكل اللي يخليني فرحانة".
معاناة زينة من مشاهد مسلسل "الليلة واللي فيها"
ولفتت زينة: "فيه مشاهد في المسلسل كان بيجيلي ضربات قلب، وكنت بقول للمخرج أنا تعبانة ومش قادرة، وكنت باموت ورحت المستشفى وأخدت أدوية لأني دخلت في شخصية المسلسل، وحاولت بشكل عنيف أطلع من حالة الشخصية لأن المشاهد كلها قاسية".
تعاطف الجمهور مع شخصية زينة
وأكملت: "كنت الشخصية اللي أبوها رماها وأمها اتجوزت علشان تصرف على بنتها، حتة اللحمة الحمراء وهي ضحية أمها وأبوها والمجتمع الظالم، وكل الناس اتعاطفت معايا في المسلسل والكل كان عايز ينقذني بأي شكل، الجمهور لقيته متعاطف معايا وتوحده مع الشخصية وخافوا عليها من توحش حماتها الفنانة سماح أنور العظيمة جدًّا في تمثيلها وأدائها".
