فتحي عبد الوهاب: طفولتي كانت عادية وكنت أتواصل مع والدي بالتليفون| فيديو
أرجع الفنان فتحي عبد الوهاب أسباب اختفائه عن الساحة الفنية، قائلا: "هناك أوقات يكون الإنسان ناقما من شئ أو أن هناك أحداثا ليست كما تتوقع فيحدث اختفاء عن الساحة".
وقال خلال لقائه مع الإعلامي أنس بوخش: "الطفولة كانت عادية مفيهاش أحداث جسيمة، أكثر من أن أنا كنت بعيش مع جدي وجدتي لأمي، لأن أنا أبويا وأمي كانوا دايما مسافرين ويمكن ده كان سبب في أنه أبقى مش طفل شقي، لأنه ببقى عايش طول الوقت مع ناس كبار فمكنش فيه فرصة للشقاوة.. وكان من أميز الحاجات اللي أنا ممكن أعملها أن أنا أقرا بس كانت المشكلة أن الكتب دي بتاعت جدي".
واضاف: "وأنا عندي خمس أو سبع سنين كان فيه كتاب في المكتبة الغلاف بتاعه ملون، وأنا قعدت أقرا فيه يمكن شهور كتير كملت فيه أربع ورقات بس وأنا مش فاهم فيهم حاجة بس عشان الغلاف بتاعه ملون والكتاب كان اسمه حرب الأيام الستة".
وأوضح أنه كان يتواصل مع والديه في طفولته عن طريق التليفون أو رؤيتهما في الإجازات الصيفية، قائلا: "في طفولتي كنت بتواصل مع أهلي في التليفون أو بشوفهم في الإجازات، وكان في الغالب أن الإجازات دي كانت مش بتبقى في القاهرة، يعني كان ممكن الصيف يبقى في اليونان أو إسبانيا".
وأضاف قائلًا: "والصيف اللي كان بيبقى في القاهرة كنت ببقى عايش مع بقية عيلتي الكبيرة.. وجدي كان بيروح بلده في الريف عشان جدي كان عنده سينما وتقريبا دي كانت السينما الوحيدة في الإقليم.. وعيشتي في الريف خلتني احب الزراعة عشان جدي كان عنده جناين.. فأنا حبيت الزراعة جدا ولغاية دلوقتي".
