باسم سمرة: أنا مش رومانسي خالص.. وكان نفسي في ولد | فيديو
قال الفنان باسم سمرة: "أنا مش زوج رومانسي خالص لكني عملي، وبحب أحافظ على البيت وكل حاجة تبقى مترتبة بتوقيتات".
معجبة تطلب الزواج من باسم سمرة
وأضاف خلال لقائه ببرنامج "واحد من الناس" الذي يقدمه الإعلامي عمرو الليثي بقناة "الحياة": "جاتلي مرة معجبة وقالت ليا عايزة أتجوزك قلت لها كلمي مراتي لو وافقت أنا تمام".
أمنية باسم سمرة التي لم تتحقق
وتابع: "عندي بنتين فرح وهند، وكان نفسي يبقى عندي ولد بس جاتلي تجربة قاسية عملنا محاولة والبنت توفيت بعد شهرين من الولادة فأثرت فيَّ جدًّا فحمدت ربنا على اللي عندي والحمد لله".
علاقة باسم سمرة مع بناته
وأردف: "عمري ما ضربت بناتي ولا مديت إيدي عليهم ولا عنفتهم، وأنا بحببهم في الحيوانات والخيل والزراعة والرسم والرحلات، بس للأسف الجيل ده خرجنا من ثورة على كورونا لحرب أوكرانيا، وعاملهم اشتراك في نادي مراحوش غير 10 مرات والجيل ده فعلًا مظلوم، الاختلاف مع بناتي في إني بعشق بيتي اللي جنب مزرعة الخيول وهما عايزين يروحوا في الحتت البرجوازية".
موقف باسم سمرة من دخول ابنته قصة حب
وتابع: "أنا مش هجوز بناتي وهخليهم يقعدوا معايا، ولو بنتي قالتلي فيه شخص وبحبه وعايزة أتجوزه هيكون ليا رد فعل مش لطيف لأني شخص مش مودرن، والحاجة الصح هعملها، ولو بنتي قالتلي بابا أنا عايشة قصة حب هناقشها وممكن أتعرف على الشخص ده ولو لقيته حد كويس بس هيطلع عين أمه".
وأكمل: "أنا كنت بغير على أختي، ويوم فرحها كنت متضايق وغيران عليها، والحمد لله ربنا رزقها بشخص كويس".
