زيزو: اتعرض عليا مبالغ خيالية علشان أسيب الزمالك.. ومحمد صلاح عايزني أحترف

قال أحمد سيد زيزو، لاعب نادي الزمالك: "أتمنى البقاء في نادي الزمالك والإحساس والمقام اللي وصلت له داخل نادي الزمالك، وفيه ناس بتقولي كنا بنشجع الإسماعيلي دلوقتي بنشجع الزمالك".

اختيار زيزو الأول

وأضاف خلال لقائه ببرنامج “الحكاية” الذي يقدمه الإعلامي عمرو أديب بقناة “إم بي سي مصر”: "اختياري الأول أقعد في نادي الزمالك أنا عندي شرط جزائي ومش هافعل الشرط الجزائي الـ2 مليون دولار احترامًا لما وصلت له ولنادي الزمالك، وفيه ناس بتجيلي لدفع الشرط الجزائي وأمشي بس أنا مقدرش أعمل كده ولو مكتوب لي أحترف أكيد هارجع لبيتي نادي الزمالك".

عروض زيزو

وتابع: "اتعرض عليا كتير جدا الفترة الأخيرة أدفع الشرط الجزائي وأمشي من الزمالك وأنتقل ليهم، والعروض ليا كانت داخلية وخارجية خليجية ومن أوروبا".
 

الشرط الجزائي لزيزو مع الزمالك

ولفت: "بقول للنادي اللى بيجيلي أنا مش هافعل الشرط الجزائي وادخلوا اتكلموا مع نادي الزمالك مع المستشار مرتضى منصور، وأنا في النهاية لو مشيت هارجع بيتي فمش عايز أمشي بالشرط الجزائي".
 

إغراءات مالية لزيزو

واستطرد: "أنا عمري في الكورة 10 سنين أو 15 سنة فأكيد عايز تأمين مستقبلي ومستقبل أسرتي وأولادي، وأنا جايلي عروض خيالية من بره وأول مرة أسمعها في حياتي والأرقام اللى أنا بسمعها وبابا بيسمعها خيالية، وفي النهاية بابا هيقعد مع مسئولي الزمالك والنقطة اللى هيتفقوا عليها هوافق عليها".
 

رغبة والد زيزو تحسم مصيره مع الزمالك

وتابع: "مفيش واحد بياخد كل حاجة في الدنيا، وأنا رغبتي الأولى في نادي الزمالك ومينفعش أطلب رقم معين وأنا عارف الإمكانيات، وقلت لبابا أول حاجة الزمالك واخترنا تاني حاجة وتالت حاجة في العروض المقدمة ليا، وإحنا هنشوف الدنيا هتوصل بينا لإيه مع جلسة والدي مع نادي الزمالك".
 

موقف زيزو من الاحتراف

وأردف: "فيه حاجات بتتحسب بالقلب وفيه حاجات بتتحسب بالعقل والاتنين عندي بيتخانقوا مع بعض، قلبي مع الزمالك وعايز اكسب بطولات اكتر من اللى كسبناها وأنا لسه ببدأ وفيه حاجات مش مبسوط من نفسي فيها، ولو حصل واحترفت هارجع بيتي نادي الزمالك، والأهلي والزمالك بالنسبة زي بعض ومش هروح للأهلي لانى بعمل تاريخ مع الزمالك فمش محتاج أروح الأهلي، ولكن الكورة احتراف، وإحنا البيت كله عندنا بقى زملكاوي حتي اصحابي اللى كانوا اهلاوية بقوا زملكاوية، وحمزة المثلوثي بيقولي أنا اكتشفت ان الزملكاوية كتير في البلد، وعايز أقول للناس افتخروا انكم زملكاوية وهيجي يوم ونبقى أسياد الساحة".

زيزو: فيريرا لما جه اكتشف إننا مبنعرفش نباصي ولا نستلم وعلمنا الكورة من أول وجديد

زيزو: الزمالك حقق إعجازا بعد الفوز بالدوري.. وهذا تقييمي للتحكيم

عرض نانت الفرنسي 

وتابع: "خلال الـ3 أيام المقبلة سيتم حسم ملف بقائي من رحيلي عن نادي الزمالك، ونادي نانت الفرنسي كان مستعدًا لدفع الشرط الجزائي وأنا رفضت، وفيه أندية من تركيا وإنجلترا، وصلاح في المعسكر الأخير للمنتخب قاللى انت لازم تحترف وتطلع بره وعندك إمكانيات تؤهلك تلعب في الدوريات الكبيرة".