انهيار الفنان نعيم عيسى في البكاء: ظروفي المالية سيئة والمعاش مش بيكفيني | فيديو

كشف الفنان نعيم عيسى أنه يمر بظروف مالية سيئة بسبب البطالة، وعدم مشاركته فى الأعمال الفنية منذ فترة طويلة، موضحًا أنه منذ 10 سنوات لم يعرض عليه عمل واحد، وأن المعاش الذي يتقاضاه من نقابة المهن التمثيلية لا يكفيه.

وبكى خلال لقائه ببرنامج "واحد من الناس"، تقديم الإعلامي عمرو الليثي المذاع على فضائية "الحياة"، قائلًا: "بقالي أكثر من 10 سنين قاعد من غير شغل، ويدوبك عايش على المعاش ومش بيكفيني، وباميل على ولادي، لما الأمراض جاتلي".

وأضاف: "تعبان ببطني وظهري وصدري، وأصبت بجلطة في رجلي وجلطة في قلبي، وركبت دعامتين، وغيَّرولي الشريان التاجي، وشالوا المياه البيضا من عينيا، وركبولي عدسات، قاسيت كتير ولسه رجلي بتوجعني".

حسرة كبيرة

وعن ظروفه المادية أكد عيسى: ”شقتي إيجار جديد بـ1200 جنيه في الشهر، وباجيب علاج بـ2000 جنيه كل شهر، وأصلًا المعاش لا بيكفي ده ولا ده، وحاسس بحسرة كبيرة، ليه انتهيت مريضًا ونائمًا في البيت، ليه مش باخرج وأمثل، ليه محدش بيبعتلي وزملائي والمخرجين مش بيزوروني؟“. 

وأكد: ”بتفرج في التلفزيون وبشوفهم بيكرموا فنانين كتير، ولا حد فكَّر يكرمني.. أنا مظلوم، ليه مفيش حد بيبعتلي شغل، والنقيب ليه مش بيزورني أو يبعتلي حد من الفنانين يزورني؟!“.

وعن زوجته التي غادرت الدنيا، بكى،  قائلًا: "زوجتي توفيت من حوالي 5 شهور، وكنا متجوزين من حوالي 60 سنة، وعمرها ما زعلتني في يوم من الأيام ولا أنا زعلتها، شعرت بحزن شديد لوفاتها لأنها كانت بتحبني وأنا بحبها، و60 سنة عايشين مع بعض زي الحلاوة، وهفضل طول عمري حزين عليها".