أحمد أبو المجد يكتب: "فن اللامبالاة" أسلوب مختلف للنجاح
كتاب "فن اللامبالاة"، باعتبره دليل لكل شخص عايز ينجح.. لازم يقاوم.. النجاح ملوش وقت محدد، ولا أسلوب معين.. النجاح ممكن ييجي في أي لحظة.
الفصل الأول في الكتاب بيتكلم عن قصة الكاتب المشهور الأمريكي من أصل ألماني مارك مانسون.. وإنه كان في بداية حياته شغال في مكتب بريد صغير.
وكان بيحب الكتابة جدا، ولكن كانت أي حاجة بيكتبها مكنتش بتنال إعجاب أي حد كان، مهما يعمل ويسوي مفيش برضه، زي ما هو.. وكانت الناس بتحتقر اللي هو بيكتبه ده.. وكان مدمن خمر ونساء وقمار.
إدمان
كمان كان بيصرف كل مرتبه القليل في إدمانه ده.. وقد إيه هو كان تعيسا إن حلم حياته مش عارف يحققه ولا يوصل له.
لحد ما جه في يوم - وكان وقتها وصل سن الخمسين.. تلاتين سنة من حياته قضاها في إدمانه وحاجات هو مكنش بيتمناها.. قضى تلاتين سنة من عمره بين أسوار الإدمان والأعمال اللي كانت بتكسبه فلوس قليلة.. وواحدة من دور النشر الصغيرة عرضت عليه إنها تنشر له كتابا.. كان نوعا من أنواع الشفقة على حاله، وكمان ما وعدتهوش بمبلغ كبير بل بالعكس كان في الموضوع شيء من المقامرة.
ولكنه قال: «أنا أمامي واحد من خيارين أن أبقى في مكتب البريد وأصاب بالجنون.. أو البقاء هنا والكتابة وتجويع نفسي لقد قررت الجوع».
رواية "مكتب البريد"
ووافق إنه يشتغل في دار النشر دي، ونشر أول رواية ليه بعنوان "مكتب البريد" في أقل من شهر واحد.
ونجح أخيرًا الكاتب تشارلز في إنه يحقق مراده وحلم حياته، وأن كتاباته تنتشر وتتعرف في العالم كله. والرواية دي نجحت نجاحا كبيرا جدا، وبعد كده أصبح كاتبا مشهورا جدا، وأصدرت له كتب كتيرة جدا وروايات وقصائد.
ورغم نجاحه ده كله، إلا إنه فضل مصرًا على إدمانه، ومحاولش ولو للحظة إنه يغير من واقعه ده.
وفي وسط كل نجاحاته دي فضل مدمنًا للقمار والنساء والخمر عادي جدا، لحد ما جه يوم وفاته وتيجي الناس علشان تعزي فيه، وإذا بهم يتفاجئوا باللي مكتوب على شاهد القبر بتاعه، عبارة "لا تحاول".
استوب.. إيه ده؟! ازاي يعني أمال أنت وصلت للي انت فيه ازاي؟! انت مش حاولت إنك تغير من وضعك وحالك من عامل في مكتب بريد لكاتب مشهور، فازاي بقى اللي انت بتقوله ده؟!
"لا تحاول"
فكان رد الكاتب اللي هو مارك مانسون كاتب الكتاب ده، إن المقصود بعبارة "لا تحاول" دي مش إن الراجل يثبط ويحبط أي حد نفسه ينجح زي كاتبنا.. لا بالعكس كل اللي يقصده إنك متحاولش تهرب من عيوبك وأخطائك، وفشلك.. متحاولش إنك تخفيها عن الناس وخايف إن الناس تكتشفها في يوم من الأيام.
كل اللي عاوز يوصله إنك تكون متقبل فكرة إنك بني آدم، بشر، تخطئ في أحيان وتصيب في أحيان، وزي ما أنت فاشل في حاجات، فيه حاجات تانية ناجح فيها.. فيه حاجات أنت كويس فيها.
كلنا بنكمل بعض، ولكن أهم حاجة عشان تنجح فعلا.. إنك تفشل ومتخافش من الفشل، ومتحاولش تهرب من فشلك بل حاول تتقبله وتتعايش معاه لأنه جزء منك.
