كنباوي وكنباوية.. حلقة رقم (100).. سكتنا للمرشد وأنصاره دخل البلتاجي وحماره

كنباوية: إيه ياكنباوي هي الصلاة خلصت 

كنباوي: أكيد ياكنباوية أمال أنا هنا بعمل اية طالع فسحة ولا واخد بريك وراجع الجامع تاني أيوه ياكنباوية الصلاة خلصت واشتريت خوخ وبرقوق من قدام الجامع وطلعت. 

كنباوية: برقوق ليه بس في الغلا اللي احنا فيه ده أنا سامعة أن الكيلو وصل 20 جنيه. 

كنباوي: وماله ياكنباويه عشرين عشرين هو احنا حنحرم نفسنا من الحاجة علشان غالية خلي العيال ياكلوا وينبسطوا .

كنباوية: مالك ياكنباوي ؟ نبرة صوتك مش عجباني 

كنباوي: ولا عجباني أنا كمان أنا مش راضي عن حال البلد ولا اللي بيحصل فيها 

كنباوية: قصدك على اللي بيعملوه الإخوان 

كنباوي: الحكاية زادت عن حدها أوي ياكنباويه كل يوم مظاهرات كل يوم مليونيات والمرشد بيسخن فيهم ويوجهم للتصعيد والبلتاجي بينفذ وصفوت حجازي بيسخن المتظاهرين ده غير الجنود اللي بيموتوا كل يوم في هجوم الجهاديين المواليين للإخوان في سينا الحكاية زادت عن حدها أوي والكيل طفح والجيش ساكت ليه مش عارف والنخبة بتقول مصالحه، مصالحة ايه مش فاهم يعني إيه نتصالح ده حتي الوزرا الإخوان بيسلطوا على محاصرة مجلس الوزرا ومحاصرة مدينة الإنتاج الإعلامي وكل المناطق والجهات السيادية في البلد دى بقت سايبة على الآخر وكل واحد في الإخوان عامل في نفسه زعيم وأبو بركه هو كمان طالع في برنامج طوني خليفه يفتي ويقول كل من انقلب على مرسي مشرك بالله ده ايه العته ده؟ إيه التخلف ده؟ 

كنباوية: ماتزعلش نفسك بكره تتلم بإذن الله 

كنباوي: ازاي بس والجيش ساكت وصابر عليهم ده حتي الشرطة مش عارفه تقبض على المرشد ولا على البلتاجي وحجازي ودول اس الفساد في البلد وهمه اللي بيقوموا المتظاهرين على الجيش والسيسي والوزارة الجديدة. 

كنباوية: ماهو الشرطة معذورة برضه البلتاجي وحجازي مستخبيين في اعتصام رابعة وأي محاوله للقبض عليهم جوه الاعتصام حيروح فيها ناس كتير والجيش مستني خروجهم من اعتصام رابعة علشان يقدر يتعامل معاهم ويقبض عليهم الجيش معذور برضه ياكنباوي وماتنساش أن وسائل الإعلام الغربي مستنية أي غلطة للجيش علشان تسخن الدنيا والجيش مش ناقص ده بيحاول يوضح الصورة المغلوطة عنه بالخارج وإن اللي عمله ده مش انقلاب وإن دا هي إرادة الشعب وهو كل اللي عمله أنه انحاز للشرعية مش اكتر من كده ووقف جنب الشعب. 

كنباوي: طيب ووقف الحال اللي احنا فيه ده مين اللي حيسدد فاتورته غير الشعب الغلبان ده كفايه عطلة بقي ووقف لمصالح الناس ووقف لعجلة الإنتاج الشوارع مقفولة وفيه محال كتير قفلت وفيه ناس أكتر خايفه تشتغل وناس خايفه تنزل الشارع ده حتي مترو الأنفاق فيه ناس بقت خايفة تركبه من كتر الاشاعات اللي بتقول إن الإخوان عاوزين يفجروه.

كنباوية: دي مش اشاعات دي حقايق الأجهزة الأمنية ظبطت أكتر من قنبلة شديدة الانفجار في محطات السادات وسعد زغلول وفي محطة الدمرداش مسكوا عامل من أنصار مرسي بيلعب في تحويلة القطارات ولولا ستر ربنا كان حصل تصادم بين القطارات كان راح فيه ناس كتير 

كنباوي: طيب عايزة أكتر من كده ايه تاني دول مش في دماغهم أرواح وحياة الناس واللي ربنا يورينا فيه يوم أسود من قرن الخروب صفوت حجازي بيقول مش مهم نضحي بمليون شهيد المهم الشرعية وعودة مرسي من تاني للحكم ولقصر الاتحادية 

كنباوية: هو اللي راح بيرجع تاني ده مجنون رسمي بكره يقع في ايد من لا يرحم ده عاوز يتكرت على قفاه علشان يفوق ويعرف أن الله حق وأنه كده بيلعب بالنار وبيحرض على أمن مصر 

كنباوي: ده اللي هاريني ومزعلني ياكنباويه نفسي الجيش ياخد موقف قوي ورادع مع الإخوان ومليونياتهم وتظاهراتهم دي. 

كنباوية: ماتقلقش ياكنباوي في الوقت المناسب الجيش حيتحرك وياخد موقف 

كنباوي: امته بس أنا خلاص زهقت 

كنباوية: الصبر طيب ياكنباوي الصبر طيب 

كنباوي: واللي مالهوش طهقان على الصبر يعمل إيه؟ 

كنباوية: يفوض أمره لله وهو حيحلها من عنده بإذنه. 

كنباوي: ونعم بالله ياكنباوية أنا حدخل أنام شويه من زهقي 

كنباوية: روق روق وماتشغلش بالك ونام وريح جسمك وبإذن الله حتبقي خير 

كنباوي: يسمع منك ربنا ياكنباويه 

كنباوية: يلا أنت خش نام وأنا حجهز أكل الفطار 

كنباوي: حاضر ياكنباوية حدخل أنام ابقي صحيني قبل أدان المغرب على طول خليني اخد كفايتي في النوم 

كنباوية: من عنيا ياكنباوي نوم الصحة والعافية على بدنك !