أنا مركب دعامة.. عمرو أديب: لو ناويين البلد تبقى زي سريلانكا مش قاعد فيها
قال الإعلامي عمرو أديب: "الناس القتلة الفاسدة اللي قاعدين يقولوا يا ريت مصر تبقى زي سريلانكا، وصلوا لمرحلة من الكره للبلد إنهم عايزين البلد تولع وتنزل على الأرض".
عملاء الخارج ودعاوى الفوضى
وتابع خلال برنامج “الحكاية” المذاع على قناة “إم بي سي مصر”: "فيه ناس عملاء قاعدين خارج مصر في أمان يا اللي بينزل عليهم الدولار والإسترليني وعمالين يقولوا لازم مصر تبقى زي سريلانكا نبقى يعني زي السنين اللي فاتت في الفوضى والانهيار".
مصير سريلانكا
وأشار: "جزء كبير من اللي جرى في يناير 2011 أننا كنا عايزين تبقى مصر زي سريلانكا وده يحصل لما توقع الداخلية ومجلس الوزراء ومؤسسات الدولة ونجيب البلد للأرض".
أمنية غريبة
وأضاف: "عمر مصر ما تكون زي سريلانكا، إيه الأمنية السافلة دي، مش عايز أقول كلمة المجلس الأعلى للإعلام يخليني أقعد بسببها في البيت".
توفير رغيف الخبز
وأشار: "انت قاعدة تشرب خمرة ومعاك نسوان وتقول ياريت نبقى زي سريلانكا ده البلد بتحاول تحط القرش على القرش وتوفر رغيف العيش وتمشي لقدام وأنت عايز توقعها".
وأكمل: "إيه الخطوة اللي بعد لما نكون زي سيرلانكا، هو فيه دولة العقل الجمعي فيها يقول إننا نجيب بلدنا على الأرض، الناس دي بمتكرهش البلد ولكن بتكره واحد بس وعلشانه عايزين يوقعوا البلد".
سقوط البلد في الفوضى
ولفت: "طبعًا الهبل واللي بريالة والعبط كتير في بلدنا وعملوا هاشتاج وقالوا أيوا نهدها ونجيبها على الأرض، فاكرين لما قالوا نوزع الفلوس على الناس وفي الآخر أخدوا إيه هو هو مفيش غيره الفوضى".
واستطرد: "يا جماعة هو فيه حد يعمل نفس الحاجة كل مرة ويتوقع نتيجة جديدة ما انتوا جربتوا ده احنا لسه بنشم نفسنا وبنقول بسم الله الرحمن الرحيم تقوموا عايزين تجيبوها على الأرض".
دعامة عمرو أديب
ولفت:"أنا تعبان ومركب دعامة لو ناويين تجيبوها الأرض أنا مش قاعد فيها وأروح أعيش في بلد عايزة تعيش".
وتابع: "أنا بقول للي عايشين في لندن وباريس مين اللى بيصرف عليكم؟ ليه مصممين توقعوا البلد؟ إلهي يارب تتهدوا ولسانكم يتقطع ياللى الأجهزة بتشغلكم".
