هنادي مهنا: بغير على جوزي ومعايا باسورد تليفونه.. والاكتئاب تسبب في زيادة وزني| فيديو
![هنادي مهنا](images/no.jpg)
تحدثت الفنانة هنادي مهنا، عن حياتها الشخصية وعلاقتها مع زوجها، وبداياتها الفنية منذ عودتها من إسبانيا للقاهرة، وقالت: "عشت فترة تعليمي فى إسبانيا، ولم أكن أطبخ ولذلك كنت رشيقة لكن بعد عودتي للقاهرة فتحت فى تناول كافة أنواع الأطعمة".
وأضافت خلال لقائها ببرنامج "كلمة أخيرة"، تقديم الإعلامية لميس الحديدي، المذاع على فضائية "اون إن": " أكلت المحشي والحمام والمسقعة وكلها أطعمة كانت سببا فى زيادة وزني، لذلك توجهت لأحد الأطباء، حتى استطعت إنقاص وزني مرة أخرى"، موضحة: "فى حفل زفافى كان وزني زائد وظهر ذلك فى الصور، لأن موعد الزفاف تم تحديده فجأة".
ونفت الفنانة هنادي مهنا، صحة ما يتردد على أن الجمال سبب شهرة الفنانة، قائلة: " النجومية والشهرة ملهاش علاقة بالجمال لكن بالشطارة والخبرة والروح، والأساس في الجمال أن يكون ذلك من الداخل قبل أن يكون في الظاهر، والمهم يكون جميل من جواه والي جوه هو الي بيوصل للناس".
وأضافت أن حزنها وفرحها يظهران بسهولة على ملامحها، قائلة: "لما بزعل أو بفرح بيبان عليا على طول وأنا شخصية بفرح وبزعل بسرعة مش بقدر أزعل لفترة طويلة، وعشان أبقى مبسوطة، وعشان مش بحب أزعل لفترة طويلة بعمل حاجات تخليني مبسوطة زي المزيكا، لانها بتفرق معايا أوي ولما بسمعها مودي بيتغير وبحب الطبيخ جدًا".
وتابعت: "أستيقظ مبكرا وأعد طعام الأفطار لزوجي، قبل ما أنزل من البيت للتصوير، ولازم أكون مطمنة أن عنده فطار وغدا وأكل لو ماعملتش كده بحس بالذنب، وبغير على جوزي ومعايا باسورد التليفون بتاعه.. وبسيب الناس تقول شائعات بدل ما يحسدونا"، لافتة: "ممكن أكون زعلانة والساعة 2 بليل أدخل المطبخ وأطبخ عادي وطالما فوق البوتجاز بنسى مشاكلي وببقى مبسوطة وأنا بعمل كده ".
دراسة الهندسة
ولفتت: " كنت بدرس في أسبانيا في مجال هندسة الصوت في مجال الموسيقى، لاني كنت بحب المزيكا أوي، وكان حلمي أني أغني قبل التمثيل واكتسبت ده من الجينات من أبويا ".
واستطردت:"لما جيت مصر اشتغلت مدرسة، ودرست كذا حاجة وكنت فاتحة شركة مع بابا، وأنا بحب أشتغل من صغري، ومش بحب أقعد في البيت، ومش بعرف أقعد في البيت ".
البداية الفنية
وأردفت: " لما اشتغلت ممثلة مكنتش مستوعبة طبيعة الشغلانة، وأن الشغل موسمي ممكن يبقى مكثف شهرين متتالين، ثم شهرين آخرين قاعدين في البيت مش بنعمل حاجة، ودي كانت حاجة بالنسبة غريبة، وكنت بقول فيه حاجة غلط لأني متعودة على الشغل اليومي وأني أنام وأصحى عشان ورايا شغل ".
وأكملت:" أول مامثلت الدنيا مامشيتش أوي، وفضلت سنتين أشتغل ومافيش حاجة تذاع لحد أول عمل، وهو افراح إبليس اللي لسه معروض قريب، رغم الانتهاء من تصويره منذ فترة طويلة، وعملت كمان فيلم ووقف كل ده سببلي في فترة من الفترات، اكتئاب وكنت قاعدة في البيت فقعدت أكل".
وكشفت عن أن جمهور السوشيال ميديا وقتها انتقدها وكان حقهم، ومتابعة:" أنا في الأساس شكلي كان زي دلوقتي، بعد فقد الوزن، لكن الفترة دي كانت سبب في زيادة وزني حينها ".