عمرو أديب يعلق على حادث قتل طالبة المنصورة: موقف الجامعة مخجل
قال الإعلامي عمرو أديب: "هذه الحادثة الوحشية البشعة أمام جامعة منصور طعن وذبح طالبة على يد زميل شيء بشع وعمل هزة نفسية في المجتمع المصري".
وتابع: "اللى آنا واقف قدامه بعض الملاحظات الغريبة شوية، الأولى إن لقيت ناس ماسكة في فكرة هو ليه محدش لحقها وهو فين الأمن والأمان، طيب ما في أمريكا راجل بيدخل برشاش وبيقتل 20 واحد، ولقيت ناس بتقول البنت لابسة ومش لابسة وبتحمل المسئولية للبنت، ولقيت ناس بتتكلم عن المسلسلات والإعلام، والقاتل الحيوان اللى قتل محدش بيتكلم عنه".
مناشدة للنيابة العامة
ولفت: "فيه ناس كتير تميل أنه اختلال عقلي، وهذا ليس اختلال عقلي ولكن توحش ورغبة في التحكم والاقتناء وكل هذا خلاه يقدم على فعلته الدنيئة، ما حدث جريمة قتل وأهيب بالنيابة العامة أنها تتصدى لقلة الأدب اللى على السوشيال ميديا، واللى بيقولوا أصل البنت الظاهر سلوكها فيه مشكلة، اللى يخوض في عرض واحدة اتقتلت ودمها لسه منشفش، ده يتجاب من قفاه".
بيان جامعة المنصورة
وأشار: "كله كوم والبيان اللى طلع من جامعة المنصورة كوم تاني بيان مخجل عن بنت من بنات الجامعة، وبيقولوا مكنش في الجامعة ده كان علي الجامعة فين العزاء والمشاطرة ودعم أهلها هي دي مكنتش بنتكم، بيان مخجل ولا ينم عن دور تربوي تعليمي محترم".
أزمة تعاطي المخدرات
وأكمل: "أرجوكم دائما دوروا على المخدرات اللى بتاكل دماغ العيال، البنت اتدبحت ويشكر إن فيه واحد قبض على الواد وهو معاه السكينة".
عزاء جامعة المنصور
وتابع: "ضحية بريئة ملهاش ذنب، ولكن لقيت واحد بيقول عزيزتي الفتاة انظري لنفسك في المراَة قبل النزول من البيت، وانا برد عليه ايه القذارة دي البنت ماتت، وانا مستني من جامعة المنصورة تطلع عزاء للبنت وروح علي المكان اللى اتدبحت فيه وتحط ورد وتقول دي بنتنا، اهم موضوع محدش بيتكلم فيه الواد دبحها وقتله".
من ناحية أخرى، كشفت جدة الطالبة ضحية القتل علي يد زميلها أمام جامعة المنصورة أن الجاني تقدم لطلب يد الضحية أكثر من مرة، ورفضت الارتباط بها، وآخر مرة قامت بعمل “بلوك” له علي الهاتف وحسابي فيس بوك وواتس آب.
وأكدت جدة الضحية أن الشاب أكد حبه لنيرة لها أكثر من مرة، وحينما رفضت الارتباط به، هددها بالقتل مرات عديدة.
وكان فريق من النيابة العامة ومصلحة الطب الشرعي وصل إلى مسرح جريمة مقتل الطالبة نيرة أشرف علي يد زميلها أمام جامعة المنصورة.
ورصد الفريق أثناء معاينة مسرح الجريمة آثار دماء الضحية علي بعد أمتار من بوابة توشكي بجامعة المنصورة.
وكان أهالي المنصورة لقنوا الشاب المتهم بقتل زميلته أمام بوابة توشكي بجامعة المنصورة علقة ساخنة وبعدها تم تسليمه لرجال الشرطة.
وكانت منطقة بوابة توشكى بجامعة المنصورة شهدت اليوم واقعة قتل طالبة على يد زميلها بالفرقة الثالثة آداب.
فريق النيابة والطب الشرعي
تلقي مدير أمن الدقهلية إخطارا من شرطة النجدة يفيد بمقتل طالبة على يد زميلها أمام بوابة توشكى بجامعة المنصورة.
وقام الطالب "محمد. ع. م"، طالب بالفرقة الثالثة آداب بقتل الطالبة “نيرة. ا”، طالبة بالفرقة الثالثة ذبحا في الشارع وأمام المارة.
وكشفت المعاينة الأولية أن الواقعة خارج الحرم الجامعي بجامعة المنصورة، حيث قام الطالب بطعن زميلته بالجامعة بالسكين عدة طعنات أمام بوابة توشكى بالمنصورة.
على الفور انتقلت قوة من رجال مباحث المديرية بعد ورود بلاغ من قسم أول المنصورة، وتبين أن طالبا بجامعة المنصورة قام بطعن طالبة عدة طعنات بسكين، ثم قام بطعن نفسه، وتم نقل الاثنين لمستشفى المنصورة الدولي.
وتم تحرير محضر بالواقعة واتخاذ الإجراءات القانونية اللازمة للعرض على النيابة العامة ومباشرة التحقيقات.
