والد الطفل صاحب واقعة تي شيرت الأهلي باختبارات الإسماعيلي يكشف كواليس الأزمة
كشف محمود أحمد والد الطفل كريم الذي منع من دخول اختبارات نادي الاسماعيلي بسبب ارتدائه تي شيرت النادي الأهلي واجباره علي خلعه، كواليس الواقعة.
اختبارات نادي الإسماعيلي
وقال والد الطفل كريم خلال مداخلة هاتفية ببرنامج “الحكاية” الذي يقدمه الإعلامي عمرو أديب بقناة “mbc مصر”: لي طفلان خاضا اختبارات نادي الإسماعيلي، ابني الأول أحمد تجاوز الاختبارات من المرة الأولى وتم تحديد له موعد لملء استمارة الانضمام لقطاع الناشئين بالإسماعيلي، غدًا الأحد، وابني الثاني كريم تم تحديد اختبار ثانٍ له بالإسماعيلي.
منع دخول اختبارات الإسماعيلي
وأضاف: "كريم ابني اللي تم منعه من دخول اختبارات الإسماعيلي بفانلة الأهلي، بيحب النادي الأهلي وكان لابس تي شيرت الأهلي ومش في دماغه حاجة وفكرة التعصب".
تعصب مسؤول نادي الإسماعيلي
وتابع:"عند وصولنا لبوابة نادي الإسماعيلي لخوض ابني كريم الاختبارات لقينا شخصين بيتعصبوا علينا بصوت عالي ومش بأدب والله العظيم، وحصل إن أحدهم زعق جامد وغلط فينا وقال لي عندي تعليمات من الإدارة الفانلة دي متخشش هنا فقلت له معلش علشان نفسية الطفل اهدا شوية، وقال لنا روحوا الأهلي إيه اللي جايبكم هنا، وزعق لنا علشان التي شيرت، وما جابش لابني تي شيرت الإسماعيلي واحد صاحبه سلفه تي شيرت منتخب مصر ورفضوا يبصوا عليه ولم يختبروه وابني التاني اللي هيروح بكرة ينضم لناشئين الإسماعيلي قلت له مش رايحين"
دعوة النادي الأهلي
ولفت: "ابني كريم نجح في اختبارات فيوتشر وسيراميكا كليوباترا وأحمد ابني كان هيمضي للإسماعيلي بس أنا رفضت بسبب اللي حصل مع كريم ابني، وأشكر الكابتن حسني عبد ربه على موقفه الإيجابي، ولكننا نفتخر بالنادي الأهلي لأنه كبير أفريقيا واستقبلنا دعوة لخوض اختبارات النادي الأهلي".
وأعرب الإعلامي عمرو أديب، عن استيائه من منع طفل من دخول اختبارات نادي الإسماعيلي بسبب ارتدائه قميص النادي الأهلي وإجباره على خلعه.
لقطة مؤسفة
وقال عمرو أديب خلال برنامج “الحكاية” المذاع على قناة “إم بي سي مصر”: "الفيديو مؤلم ومؤسف هو ملهوش ذنب هو جاي يلعب كورة ايا كان لابس فانلة الاهلي او اي فانلة".
لفتة حسني عبد ربه
وتابع:"أنا زملكاوي بس قلبي اتقطع وهما بيقلعوا الواد الفانلة ولكن رموز نادي الإسماعيلي ومنهم حسني عبد ربه كان ليهم موقف جيد".
ميسي مصر
وأكمل:"جايز الولد ده يكون ميسي جديد أو صلاح جديد، وغالبا الموهوب غير قادر، والمدير الجديد أو المحترم هو اللى عنده القدر انه ياخد الموهوبين من الخلف ويطلع بيهم للأمام".
موهبة طفل اختبارات الإسماعيلي
ولفت:"حركة زي دي يا تنهى موهبة لاعيب يا تخلص علي شبل يا تنهى عليه، واللى منعه ده مسئول أمن وأرجو اننا نرجع تاني لتبنى الموهبة لاننا دولة قائمة علي الموهبة، لغاية أفشة وزيزو، لو الولد ده عايز يلعب في الأهلي ياريت الأهلي ياخده ويدخل الإختبارات ولو كويس يتكرم ويتقبل، الولد بيحب الأهلي، بناشد الكابتن بيبو لو الولد مش عايز يلعب في الإسماعيلي ويلعب في الأهلي اقبلوه ان شاء الله الطفل يلقى مكانه في الإسماعيلي أو الأهلي".
جبر خاطر الطفل
واستطرد:"أهيب بالنادي الأهلي اختبره ولو ينفع خدوه، والنوادي دي ملك البلد والمصريين ومحدش له تحكم علي حاجة واجبروا بخاطر الولد".
