اتلم المتعوس على خايب الرجا

المودة والترابط بين الأسر المصرية اللى هى مؤمنة بالمثل الشعبى "زيتنا فى دقيقنا" يخلى كبير العيلة ديما يفضل أهله على نفسه، واهو كله بيبان فى صندوق الانتخابات، هذه المقدمة كانت لازمة جدًّا لأن الشىء لزوم الشىء، أما الشىء الأولانى حسب محرر هريدى نيوز هو إن الحاج محمد مرسى أناب الدكتور أحمد فهمى رئيس مجلس الشورى ونسيبه، مش نسيبك منه، لأ خالص لمؤخذه، يعنى صهره، المهم إنه من منطلق الأقربون أولى، الريس قال: يا أبو نسب سافر انت للمشاركة على رأس وفد رفيع المستوى فى احتفالات تونس بالذكرى الثانية لثورة 14 يناير، محررنا قعد يعس من تحت لتحت ويسأل ويشمشم لحد ما عرف إن سبب الاهتمام الجامد ده بتونس هو إن فيه علاقة خصوصية بين الدولتين، وسببها إن تونس هى اللى عارفة الطريق وبتسبق دايما بخطوة، وطبعا مرسى عايز يعرف كيف يعلن إفلاسه فبيسأل أهل الخبرة .. يا سلام عليكى يا تونس يا مدلعانة ... وقد علم محرر هريدى نيوز أن الدولتين تسيران على المثل القائل: اتلم المتعوس على خايب الرجا.