حنان ترك: مقدرش أفتي في الدين ودراستي للعلوم الشرعية على سبيل النجاة | فيديو
كشفت الفنانة حنان ترك عن إصابتها بنزلة برد، وذلك خلال مقطع بث مباشر نشرته عبر حسابها الرسمي على موقع التواصل الاجتماعي "فيس بوك"، قائلة: "أنا عندي برد كان المفروض أطلع من أسبوع فات ومحبتش أتاخر عليكوا واستحلمونى واستحملوا صوتى".
وتحدث حنان ترك خلال البث المباشر عن الكثير من الأمور قائلة: "عاوزة أشكركم وأشكر أسرتى اللى وقفت جنبى وقت مرضي وكل أصدقائى اللى بيسألوا عليا ودكتور أشرف زكى كان بيكلمنى وبيطمن عليا، وبشكر الجمهور اللى بدعواته الحمد لله بقيت أحسن بكتير وكويسة جدا".
وأضافت: "عايزاكم تساعدونى على أى حد بيتكلم باسمى.. إنتوا اللى تقفوا لأنكوا عارفين حنان ممكن تقول إيه ومتقولش إيه لأن كان في صفحات كتير باسمى بيتكلموا باسمى فى الدين وفى السياسة.. وأنا مليش علاقة بيها وعمري ما أنزل بوستات بالشكل ده".
وتابعت: "أولًا سياسيًا أنا جاهلة جدًا ومعنديش وعي سياسى أني أعرف أقول اعملوا حاجة أو متعملوش ومعنديش الثقافة اللى تخلينى أنظر سياسيًّا، أما بالنسبة للدين قلتها زمان وهقولها تانى أنا درست علوم شرعية على سبيل النجاة لا على سبيل الدعاء، والدعوى دى موضوع كبير جدا ومحتاج علم وفقه مش أي حد يقدر يعملها، أنا فين والكلام الكبير ده فين".
وأردفت حنان ترك خلال البث المباشر: "أى حاجة نزلت على لسانى ويقولوا حنان قالت فتوى وإن ربنا غضبان على فلان، أنا مليش علاقة خالص، أنا لا بحرم ولا بحلل ولا الكلام ده له أى علاقة بيا، وأنا مقدرش أفتى في دين ربنا، وده له ناسه، ونصيحة لكل الناس لما تحب تاخد نصيحة خدها من أهل العلم والناس المسئولين عن الفتوى ومصرح لهم بها".
