صافي صبري تكشف الأشياء المقربة لقلب الفنان الراحل سمير صبري |فيديو
قالت صافي صبري، مديرة أعمال الفنان الراحل سمير صبري: "كان خير جدًا وممكن يخصم للناس اللي معاه بسبب عدم التزامهم بس يرجع يعطيهم الخصم".
أكلات سمير صبري المفضلة
وأضاف خلال لقائها ببرنامج "بالخط العريض" المذاع على قناة "الحياة": "سمير صبري كان بيحب الرياضة، وكان بيحب أكل ورق العنب والكوارع".
أكثر فيلم أحبه سمير صبري
وتابعت: "أكتر فيلم كان بيحبه سمير صيري هو "البحث عن فضيحة" وكان بيحب "الأحضان الدافئة" و"بالوالدين إحسانا" و"السلخانة".
وأردفت: "سمير صبري لسه عايش جوانا بجد، ومكانته كبير في قلوبنا".
وكشف عيد، مساعد الفنان الراحل سمير صبري، اللحظات الأخيرة في حياته، مؤكدًا أنهى ليلته الأخيرة بقراءة القرآن الكريم.
علاج سمير صبري
وقال خلال لقائه ببرنامج "بالبنط العريض" المذاع على قناة "الحياة": "ذهبت إليه يوم الخميس الساعة العاشرة مساءً، ودخلت غرفته فطلب مني مساعدته في الحصول على العلاج، وبالفعل حصل على الدواء المطلوب، وقمت بتنظيف جرحه الخاص بالحقن التي يحصل عليها، وقال لي الدنيا تمام فقلت له زي الفل بنسبة 90% جميل".
لحظات سمير صبري الأخيرة
وتابع: "جلس سمير صبري في الفراندة وقال لي هاتلي نضارة القراءة بتاعتي والمصحف فجيبتله جزء عم اللي كان بيقرأه وظل يقرأ قرآن لحد الساعة 4 الصبح، وسألني الفجر أذِّن فقلت أيوا فقال لي دخلني علشان أتوضأ وفعلًا ساعدته، وتوضأ وقعدته على السرير، وأخد المصحف تاني وقعد يقرأ قرآن وبعدها صلَّى الفجر، وطلب مني أسيب الشبابيك منورة ومقفلهاش، وقعدت معاه شوية ورجع يقرأ قرآن تاني، وبعدين صدق وقال لي افتحلي بقى التليفزيوني وهاتلي نايل سينما فجيبتهاله وقعد يتفرج عليها لحد الساعة 7 الصبح وبعدين طلب مني أجيبله مشروب اليانسون، وفعلًا حضرتله اليانسون، وبعدين أتغطى ونام وقال لي تعالي نام جنبي، ونمت أنا كمان وصحيت على تليفون المنتج صفوت غطاس فسألني عن الفنان سمير صبري فقلت له نايم، ولما دخلت له أصحيه لقيته نايم متجهًا للقبلة، وبهز فيه أصحيه مبيصحاش فجريت على الأمن وطلبت إحضار دكتور ضروري ومكنتش متوقع أنه مات، والدكتور أحمد عبد العزيز جاله وأنا من جوايا كنت بعيط، ولما خرج قال لي كلم حد من قرايبه الفنان مات، فاتصلت بمدام ليلى بنت خالته وأبلغتها بخبر وفاته".
وتُوفي الفنان سمير صبري الجمعة قبل الماضي داخل أحد الفنادق بالقاهرة عن عمر يناهز الـ٨٦ عاما بعد صراع مع مرض القلب.
وحضر الجنازة كل من الفنان أشرف زكي نقيب الممثلين، والفنانين يسرا، وليلى علوي، وإلهام شاهين، وميرفت أمين، ونهال عنبر، وأحمد السقا، وهاني رمزي.
وشارك في الجنازة أيضًا الفنانة دنيا سمير غانم، وزوجها الإعلامي رامي رضوان، والمخرج خالد جلال، والفنانة نادية الجندي، والفنان إيهاب فهمي، والأب بطرس دانيال رئيس المركز الكاثوليكي للسينما.
يشار إلى أن الفنان سمير صبري قدَّم عشرات الأعمال في السينما والمسرح والتلفزيون، وكان له تجاربُ ناجحة جدًا في تقديم البرامج أبرزها تجربة النادي الدولي في السبعينيات.
