بحكم الصداقة القوية.. ماذا قال حسن يوسف عن زواج سعاد حسني وعبد الحليم حافظ | فيديو
قال الفنان حسن يوسف: "عماد حمدي في فيلم "الخرساء" قاللي هنصحك نصيحة محدش هيقولهالك امشي مع سنك مش هتفضل الولد الشقي امشي مع سنك علشان تفضل عايش في الوسط الفني، أما سعاد حسني فمحسبتهاش صح وجت في وقت وقفت ضد سنها وملامحها، ومقدرتش تتحمل فكرة أنها كبرت في السن".
حقيقة زواج سعاد حسني والعندليب
وأضاف خلال لقائه ببرنامج "كلام الناس" المذاع على قناة "إم بي سي مصر": "عبد الحليم حافظ كان صاحبي أوي وسعاد حسني كانت صاحبتي أوي، وكنت على يقين أنهم بيحبوا بعض، بس مكنتش بحب أسألهم اتجوزتوا ولا لأ، ومقولتش أدخل المنطقة الحساسة إلا لما يقولولي وهما مقالوش.. فمسألتهمش خوفًا أني أخسرهم".
حكاية فاتن حمامة
وتابع: "فاتن حمامة كنت أشوف فيلمها وأنا طالب 5 مرات لأني كنت بحب أداءها وتمثيلها، واتصورت معاها في فندق مينا هاوس، وقلت لها سيبنا المدرسة علشان كلنا بنحبك، وأخدت معاها صورة، وفي أول يوم تصوير معاها في "الباب المفتوح" قعدت جنبها أظهرت لها الصورة فقالت لي اوعى توريها لحد لأنها كانت كبرت شوية".
مكالمة نادية لطفي الأخيرة
وأردف: "نادية لطفي كانت صاحبة صاحبها، وفضلنا أصحاب، وآخر مكالمة جمعتني بيها أنا وشمس البارودي قبل ما تدخل في الغيبوبة الأخيرة ليها قبل وفاتها".
وقال الفنان حسن يوسف في نفس اللقاء: "اشتغلت مع سعاد حسني كتير أوي من أول بطولة ليها في فيلم "مفيش تفاهم"، والكيميا الفنية بتاعتنا كانت متوافقة مع بعض، فعملوا بينا سلسلة أفلام "حكاية 3 بنات" و"الثلاثة يحبونها" و"فتاة الاستعراض" وعملنا مع بعض حوالي 12 فيلما".
مشاجرة سعاد حسني
وأضاف: "كنا أنا وسعاد حسني زي الإخوات، ومجمعناش قصة حب لدرجة أنها كانت تشتكي لي من مشاكلها الزوجية الخاصة، وكانت متزوجة من صديق لينا مصور اسمه صلاح كريم، وكانوا يتخانقوا الساعة 2 الصبح تكلمني الحق صلاح عايز يضربني أنزل أجري بالبيجامة الروب وهي جنبي في الزمالك".
حياة سعاد حسني
وتابع: "سعاد حسني الله يرحمها لم تر السعادة إلا في الأفلام اللي صورتها، أما ما وراء الكاميرا فبؤس وتعاسة وسوء حظ في الزواج والأصدقاء، وتوفيت بشكل لم نكن نتوقعه".
