عمرو زكي: بعد تعرضي لحادث تقربت من ربنا.. وكنت بشتغل وعمري 12 سنة علشان علاج أمي
قال عمرو زكي، لاعب نادي الزمالك ومنتخب مصر السابق: "اشتغلت من وأنا عندي 12 سنة مع أخويا لما والدي كان مسافر ووالدتي كانت تعبانة، واشتغلنا علشان نجيب ثمن الحقنة وعلاج أمي".
مهن عمرو زكي في الصغر
وأضاف خلال الجزء الثاني من لقائه ببرنامج "سابع سما" الذي تقدمه الإعلامية راغدة شلهوب بقناة "النهار": "اشتغلت نقاش وحداد وفي الفراشة علشان نوفر مصاريف علاج أمي لأنها كانت بتعاني من الوزن الزيادة وجالها انزلاق غضروفي".
وتابع: "الشغلانات الصعبة اللى اشتغلتها وأنا صغير عملت مني راجلي، وأنا بتشرف بأي شغلانة اشتغلتها قبل الكورة".
دروس حادث عمرو زكي
وأردف: "بعد الحادثة اللي عملتها روحت عملت عمرة وقعدت مع نفسي وبقيت قريب من ربنا وبحاسب نفسي على أبسط الأشياء، ولو مش هعمل حسنة مش هعمل سيئة، ولما بصلي بحس أن مرتاح".
وروى عمرو زكي، لاعب نادي الزمالك ومنتخب مصر السابق، تفاصيل الحادث الذي تعرض له وكاد يودى بحياته.
حادث عمرو زكي
وقال عمرو زكي خلال الجزء الثاني من لقائه ببرنامج "سابع سما" الذي تقدمه الإعلامية راغدة شلهوب بقناة "النهار": "كنت خارج من الساحل الشمالي وركبت عربيتي وراجع على القاهرة وكان قدامي أتوبيس سياحي سرعته بطيئة، واضطريت أزود سرعة العربية علشان أعديه ولكن فجأة لقيت قدامه ميكروباص وأنا مش شايفه فعملت غرزة فالأتوبيس خبطني من ورا، والعربية خبطت في الرصيف والميكروباص واتقلبت 8 مرات لحد لما نزلت تحت المشاية واتخبطت في عمود كبير وبعدين فقدت الوعي واتنقلت مستشفى العلمين، بس والله العظيم تلاتة مكنتش سكران، وقعدت 33 يوم في غيبوبة وأنا معرفش، وأخدت 60 غرزة في دماغي".
محمد زيدان
وأضاف عمرو زكي: "وقت الحادثة كان أول حد موجود محمد زيدان، وأغمى عليه لما شاف الدم اللي نازل مني".
ضياع حلم عمرو زكي
وتابع: "العربية اللي عملت بيها حادثة كانت حلم حياتي أنى أركبها ومقعدتش معايا إلا 24 ساعة، بس مكنتش سكران ولا كان معايا بنات".
إصابات عمرو زكي
واستطرد: "لما فوقت من الحادثة لقيت ناس كتير حواليا، وكنت بسلم عليهم وبكلمهم وأنا مش حاسس أنى أخدت 60 غرزة في دماغي، وقعدت 33 يوم غيبوبة، ومكنتش مصدق أنى عملت حادثة وحصلى اللى حصل، وكان كل اللى في دماغي أنهم عاملين حوار علشان يقفشوا العربية".
