عمرو زكي يروي كواليس أصعب أيامه وأزمته المادية | فيديو
قال عمرو زكي لاعب نادي الزمالك ومنتخب مصر السابق: "شخصيتي اتغيرت 180 درجة وبقالى سنة بعيد عن كل الناس ولا بسهر ولا بقابل حد ودخلت في اكتئاب".
أزمة عمرو زكي
وأضاف خلال الجزء الثاني من برنامج "سابع سما" الذي تقدمه الإعلامية راغدة شلهوب بقناة "النهار": "قبل تعييني نائب رئيس قطاع الناشئين في نادي الزمالك ودعم الناس ليا بعد مبادرة أحمد حسام ميدو، حسيت إنى كبرت مرة واحدة رغم ان سني 38 سنة ولمدة سنة مخرجتش برة البيت وكان عندي 3 عربيات فقدتهم بس عمري ما هقول لحد حاجة ومريت بأزمة مادية وراحت فلوسي كلها وقلقت على مستقبل ولادي".
قلق عمرو زكي علي مستقبل ابنائه
وتابع: "صعبت عليا نفسي لما دخلت في أزمة مادية بس عمرى ما حسبت الحياة فلوس بس قلقت علي بكرة لولادي، في الوقت اللى عمرى ما فكرت أقول لحد يساعدني".
وروى عمرو زكي لاعب نادي الزمالك ومنتخب مصر السابق، تفاصيل الحادث الذي تعرض له وكاد يودى بحياته.
حادث عمرو زكي
وقال عمرو زكي خلال الجزء الثاني من لقائه ببرنامج "سابع سما" الذي تقدمه الإعلامية راغدة شلهوب بقناة "النهار": "كنت خارج من الساحل الشمالي وركبت عربيتي وراجع علي القاهرة وكان قدامي أتوبيس سياحي سرعته بطيئة واضطرين أزود سرعة العربية علشان اعديه ولكن فجأة لقيت قدامه ميكروباص وانا مش شايفه فعملت غرزة فالأتوبيس خبطني من ورا، والعربية خبطت في الرصيف والميكروباص واتقلبت 8 مرات لحد لما نزلت تحت المشاية واتخبطت في عمود كبير وبعدين فقدت الوعي واتنقلت مستشفى العلمين، بس والله العظيم تلاتة مكنتش سكران، وقعدت 33 يوم في غيبوبة وانا معرفش، واخدت 60 غرزة في دماغي".
محمد زيدان
وأضاف عمرو زكي: "وقت الحادثة كان أول حد موجود محمد زيدان وأغمى عليه لما شاف الدم اللى نازل مني".
ضياع حلم عمرو زكي
وتابع: "العربية اللى عملت بيها حادثة كانت حلم حياتي انى أركبها ومقعدتش معايا الا 24 ساعة، بس مكنتش سكران ولا كان معايا بنات".
إصابات عمرو زكي
واستطرد: "لما فوقت من الحادثة لقيت ناس كتير حواليا وكنت بسلم عليهم وبكلمهم وانا مش حاسس انى اخدت 60 غرزة في دماغي وقعدت 33 يوم غيبوبة ومكنتش مصدق انى عملت حادثة وحصلى اللى حصل، وكان كل اللى في دماغي انهم عاملين حوار علشان يقفشوا العربية".
