صابرين: قبلت أكون الزوجة الثانية لهذا السبب | فيديو
قالت الفنانة صابرين: "الزوجة الثانية تقليل من شأن المرأة في حالة لو كان الراجل اللي معاها واخدها تكون معاه زوجة ثانية في السر وتبقى في الضل وما تخلفش".
زوج صابرين
وأضافت خلال لقائها ببرنامج "العرافة" المذاع على قناة "المحور": "احترمت زوجي لما عرض على زوجته الأولى أنهما ينفصلوا لإنه عايز يتجوزني فهي رفضت وقالت له أنا عايزة أربي ابني وجالي وقال لي هي عايزة تبقى مع ابنها فأنا اللي ما أرضهوش على نفسي ما أرضهوش على أي ست حتى لو ما كانتش مصرية".
صابرين الزوجة الثانية
وتابعت: "تعدد الزوجات لا يقلل من شأن المرأة لو كان في العلن وفي حالة العدل، والعدل في التعدد نسبيًّا مش موجود، وزوجة زوجي الأولى اتظلمت بعد زواجي منه علشان كده طلبت الانفصال وانفصلوا، والحق يقال إن طارق زوجي قعد معايا وفهمني كل الظروف اللي كانت مع مراته الأولى ومنها أنها شالت الرحم وهو كان نفسه ينجب تاني، فأنا احترمته".
وعلقت الفنانة صابرين، في نفس اللقاء، على تصريح الفنانة حلا شيحة بأن الحجاب شرف وأنها تحاول أن يتقبل الله منها، قائلة: "أنا مليش علاقة بحجابها بس موقفها مع أبوها مريب ما ينفعش تهاجمه على السوشيال ميديا، وعودتها إلى الحجاب مرة أخرى دا تخبط".
صابرين تكشف رأيها في الحجاب
وتابعت: "لما عملت مسلسل "كشكول لكل مواطن" كنت مهزوزة وما كنتش أنا بسبب الحجاب، علشان كده أنا أبرر لحلا شيحة تخبطها في العودة للحجاب والابتعاد عن التمثيل".
شرف المرأة
وأضافت: "أي حاجة في الدنيا بتستر المرأة فهو شرف مش شرط الحجاب، والشرف في كل الأخلاقيات مش بس في الحجاب، وحلا شيحة حرة في حجابها".
