مربوحة تزلزل تويتر بعد إبداع رحمة أحمد في الكبير أوي.. ومتابعون: قلبت السوشيال ميديا

تصدر هشتاج #مربوحة، موقع التدوينات القصيرة تويتر، بعد الأداء القوي للممثلة الشابة رحمة أحمد بطلة مسلسل الكبير أوي مع الفنان أحمد مكي.

وجاءت تعليقات متابعي تويتر مشيدة بأداء رحمة أحمد، في المسلسل، حيث قال متابعا: "إحقاقًا للحق شكرًا #أحمد_أمين أنه طلع الكوميديانة الجميلة #رحمة_أحمد.. اتفرجوا على مسرحيات أمين وشركاه هتشوفوا الكوميديا النظيفة الجميلة الهادفة".

وأضافت مغردة: "يجب أن يعترف الجميع أن #رحمة_أحمد موهبة قدمها لنا مشكورًا الموهوب @AhmedAmin".

وأشارت أخرى إلى أن رحمة أحمد خطفت الأضواء من برنامج رامز، وأن مربوحة قلبت السوشيال ميديا.

كما كان للإعلامي عمرو أديب تعليق على أداء رحمة أحمد وقال: "#مربوحة اديتنا كلنا درسا مهما: مفيش حد لا يعوض مفيش حد لا يستبدل ولو أنت موهوب ومجتهد تأخد قلب العالم كله، وأخيرا بلاش نتوقع فشل حد قبل ما يقدم اللي عنده كله".

وذكرت متابعة: "البنت دي دمها خفيف قوي وعندها قبول رهيب.. موتتني ضحك براڤو عليها".

بينما ذهب مغرد لإمكانيات أحمد مكي في صناعة النجوم وقال: "أحمد مكي مش مجرد فنان #أحمد_مكي صانع نجوم.. صانع هدرس وفزاع ومربوحة ومخرج غيرهم نجوم كبيرة، وديما بيعتمد أنه ميستسهلش وجود الممثلين اللي معاه ع قد ما بيكون الأهم أنه هو اللي يكتشفهم ويراهن بيهم رهان كسبان".

واختتم متابع التعليقات وقال: "أنا ضحكت ضحك السنة كلها تقريبًا ما شاء الله موهبة حقيقية وخفة دم وعفوية كده وقبول من غير اصطناع".

وعلقت الممثلة الشابة رحمة أحمد بطلة مسلسل الكبير أوي مع الفنان أحمد مكي، على ردود الفعل بعد عرض الحلقة الخامسة من المسلسل، وذلك عبر تدوينة طويلة كتبتها بحسابها الشخصي بموقع التواصل الاجتماعي "فيس بوك".

مسلسل الكبير أوي 

وقالت رحمة: "أنا مش عارفة أعبر عن إحساسي بالامتنان.. الحمد لله والشكر لله أي حاجة حلوة حصلت أو اتقالتلي ده كرم كبير أوي من ربنا يمكن أكبر من اللي أستحقه.. عاوزة أقول ٣ نقط، الأولى وهفضل أقول البوقين دول كل ما حد يشاور النقطة دي أن فنانة زي دنيا سمير غانم لا تقارن بحد.. أنا مش حد خالص.. أنا من فانز دنيا سمير غانم.. لأن لو اتحطينا في مقارنة من المؤكد أني أنا اللي هبقى خسرانة".

وأضافت: "النقطة الثانية.. بعد توفيق ربنا أن فنان زي أحمد مكي يدي مساحة لحد يقول حاجة مبتحصلش من أي فنان موجود عالساحة، الراجل ده عنده اللي يكفيه وزيادة أنه يسيب فنان قدامه يقول وهو سايب إيده، هما اتكلمت عنه مش هوفيه حقه فنيًّا ولا إنسانيًّا، والمبدع أحمد الجندي ميتخيرش عنه، يسيبك تقول، ويعليك ويركبلك شغل وذكي يعرف يطلع ضحك من أي شخصية ويحطها في مكانها الصح".

دعم أحمد أمين

وأكملت: "الثالثة.. ليك انت يا حبيب قلبي، أخويا الكبير الداعم المستمر بكل الطرق، صادق في فرحته، أنا مهما حكيت عاللي عملته معايا عشان أوصل أني أبقى في عمل من أهم الأعمال في رمضان مش هكفي فيك كلام، شكرًا أحمد أمين الأخ والفنان والإنسان أنك دايمًا جنبي، أحمد أمين.. أحمد مكي.. أحمد الجندي.. انتو مكسب لأي فنان ولأي شخص وبشكر ربنا دايمًا أن ربنا كتبلي أني أعرفكو".

وأنهت حديثها قائلة: "وشكرًا لأي حد دعمني حتى لو بكلمة كويسة وبالأخص صلاح الدالي.. فنان هياخد حقه كويس جدًّا ويستاهل أكتر بحبك يا صلوحة.. شكرًا لأي حد وقف جنبي واللي اداني ضهره وربنا لأوريك".