عائشة بن أحمد: اعتذرت عن دور مع عادل إمام لهذا السبب|فيديو
قالت الفنانة التونسية عائشة بن أحمد:"من صغري وأنا بحب الزعيم عادل إمام ولما كبرت قابلته في مهرجان صفاقس ولما مسك الميكروفون يتكلم عن السينما كنت بنظرله وعينيا فيها قلوب".
أول لقاء مع عادل إمام
وتابعت خلال الجزء الثاني من لقائها ببرنامج "سهرانين" الذي يقدمه الفنان أمير كرارة بقناة "أون إي":"سلمت علي الزعيم عادل إمام في أول لقاء جمعني بيه وكنت مكسوفة أوي ومش عارفة اتكلم معاه وبعد كده مشوفتهوش تاني".
اعتذار عن عمل مع الزعيم
ولفتت:"جالى عرض اشتغل مع الزعيم عادل إمام بس وقتها كنت متعاقدة في عمل تاني وهما كانوا عايزني أكون متفرغة للدور، لأن الدور كانت مساحته كبيرة أوي، واعتذرت عن الدور ولكنى بعد كده اتضايقت إنى معملتش الدور وأعطوه لفنانة تانية وبصيت لها في الدور وحسدتها بجد، ولكن يكفيني ترشحي للعمل مع الزعيم، وأتمنى أمثل معاه ولو مشهد واحد".
وقالت الفنانة التونسية عائشة بن أحمد في نفس اللقاء: "وأنا صغيرة لو مكنتش أنام بدري الساعة 8 بالليل كنت بفضل أعيط جامد وبحس أن فيه كارثة هتحصل وأني مش إنسانة طبيعية لو منمتش بدري".
مزاج عائشة بن أحمد
وتابعت خلال لقائها ببرنامج "سهرانين" الذي يقدمه الفنان أمير كرارة بقناة "أون إي": "لغاية دلوقتي أنا بنام بدري، وبسهر لما يكون فيه شغل أو خروجة، ولكن بحس أني لو مصحتش بدري أن اليوم ضاع ومعملتش فيه أي حاجة ومش عايشة يومي كويس".
مشكلة عائشة بن أحمد
وأضافت: "لو نمت متأخر يومي بيتلغبط وبكون متعصبة ومش طايقة نفسي ولا اللي حواليا ومزاجي وحش، وبحتاج أنام على الأقل 8 ساعات، علشان كده مبحبش السهر".
وأكدت الفنانة عائشة بن أحمد في حديث سابق، أن علاقتها بزملائها فى الوسط الفنى جيدة جدا، ولكن ليس لديها الكثير من الأصدقاء من النجوم.
وأضافت عائشة في لقائها ببرنامج "الراديو بيضحك"، تقديم الإعلامية فاطمة مصطفى، عبر الراديو 9090: "عندي أصدقاء فنانين فى تونس أكتر وده شيء طبيعي، أنا مش فى بلدي ولسه مش عارفة الناس هنا كويس، وكان صعب أني أندمج كده بسهولة فى الأول".
السوشيال ميديا
وعن علاقتها بالسوشيال ميديا قالت: "أنا بالنسبة لي مواقع التواصل الاجتماعى لها هدف، يعني لما أجي أنزِّل حاجة بقول إيه الهدف من الصورة دي، أو من البوست أو الكلمة اللي هكتبها، ومينفعش أنزل صورة علشان بس الناس تشوفني".
وعن مسلسل نيوتن قالت: "لم أتوقع كل هذا النجاح للمسلسل وإن كنت توقعت أن يحظى بمتابعة جيدة من الجماهير لأن الشخصيات تركيبتها غريبة ومثيرة والأحداث متنوعة وسريعة وتناقش قضية مهمة".
وكشفت عائشة علاقتها بأبطال المسلسل قائلة: "أنا بحب سيد رجب جدا، وهو شخص محترم وصديق عزيز هادئ وحساس".
وأبدت سعادة شديدة بالعمل مع منيري ومحمد ممدوح وكل أبطال العمل.
