عائشة بن أحمد: كنت بتريق على نفسي في اللهجة المصرية وخفت من أمير كرارة بسبب مظهره
قالت الفنانة التونسية عائشة بن أحمد: "أول 3 سنين جيت مصر كنت بتريق على نفسي في اللهجة المصرية، والمصري بتاعي كان ضايع ودلوقتي بقى أحسن".
مشكلة اللهجة المصرية
وتابعت خلال لقائها ببرنامج "سهرانين" الذي يقدمه الفنان أمير كرارة بقناة "أون إي": "مكنتش أعرف أقول جملتين مصري، وكنت خايفة ومرعوبة في مسلسل ألف ليلة وليلة".
سر الخوف من أمير كرارة
وأضافت: "في أول تجربة لي في مصر مكنتش عارفة حد، واللهجة كانت واخدة من أدائي وتركيزي في التمثيل، وكنت خايفة ومخضوضة من أمير كرارة في مسلسل "ألف ليلة وليلة" لأنه طويل وشعره طويل ولبسه كان مخوفني، ولكن اكتشفت خلال التصوير أنه كويس ومفيش أي خوف ناحيته".
وقالت الفنانة التونسية عائشة بن أحمد، في نفس اللقاء: "وأنا صغيرة لو مكنتش أنام بدري الساعة 8 بالليل كنت بفضل أعيط جامد وبحس ان فيه كارثة هتحصل وانى مش انسانة طبيعية لو منمتش بدري".
مزاج عائشة بن أحمد
وتابعت: "لغاية دلوقتي أنا بنام بدري، وبسهر لما يكون فيه شغل أو خروجة، ولكن بحس أنى لو مصحتش بدري أن اليوم ضاع ومعملتش فيه أي حاجة ومش عايشة يومي كويس".
مشكلة عائشة بن أحمد
وأضافت: "لو نمت متأخر يومي بيتلغبط وبكون متعصبة ومش طايقة نفسي ولا اللي حواليا ومزاجي وحش، وبحتاج أنام على الأقل 8 ساعات، علشان كده مبحبش السهر".
وأكدت الفنانة عائشة بن أحمد في حديث سابق، أن علاقتها بزملائها فى الوسط الفنى جيدة جدا، ولكن ليس لديها الكثير من الأصدقاء من النجوم.
وأضافت عائشة في لقائها ببرنامج "الراديو بيضحك"، تقديم الإعلامية فاطمة مصطفى، عبر الراديو 9090: "عندى أصدقاء فنانين فى تونس أكتر وده شيء طبيعى، أنا مش فى بلدى ولسه مش عارفة الناس هنا كويس، وكان صعب أني أندمج كده بسهولة فى الأول".
السوشيال ميديا
وعن علاقتها بالسوشيال ميديا قالت: "أنا بالنسبة لى مواقع التواصل الاجتماعى لها هدف، يعنى لما أجي أنزل حاجة بقول إيه الهدف من الصورة دى، أو من البوست أو الكلمة اللى هكتبها، ومينفعش أنزل صورة علشان بس الناس تشوفنى".
وعن مسلسل نيوتن قالت: "لم أتوقع كل هذا النجاح للمسلسل، وإن كنت توقعت أن يحظى بمتابعة جيدة من الجماهير لأن الشخصيات تركيبتها غريبة ومثيرة والأحداث متنوعة وسريعة وتناقش قضية مهمة".
وكشفت عائشة علاقتها بأبطال المسلسل قائلة: "أنا بحب سيد رجب جدًّا، وهو شخص محترم وصديق عزيز هادئ وحساس".
وأبدت سعادة شديدة بالعمل مع منيري ومحمد ممدوح وكل أبطال العمل.
