الضحك من غير سبب مش قلة أدب!!
واحد من الناس عرف الرجولة تعريف غريب قوى، يعنى أمتى بجد تحس أنك بقيت راجل وناضج.. مش هتصدق التعريف دا كان بيقول مع أول ضحكة تضحكها من قلبك على نفسك.. طبعًا دلوقت أنت عرفت السر ليه مصر كلها رجالة دلوقتى -مع الاعتذار طبعًا للصواريخ والقنابل الفتاكة-.. عشان كلنا دلوقتى بنضحك على خيبتنا.. ويا ريت إحنا بس، دى الدنيا كلها ضكحت من قلبها على أكبر خيبة شربها الشعب المصرى -دا بخلاف المطرة اللى خلت سواق الميكروباص بقدرة قادر بقى شبه القبطان، وهو سايق عربيته قصدى سفينته فى شوارع مصر-، وأظن أن التفسير دا هيخليك تغير رأيك لو لقيت واحد بيضحك من غير سبب.. المرة دى مش قلة أدب.. يعنى لو أنت ماشى وبصيت لقيت واحد مرة واحدة فضل يضحك ويكركر من الضحك ويقع على قفاه كمان، أعرف على طول أنه افتكر حكاية النهضة والخيبة القوية اللى شربتهاله الجماعة.. وطبعًا اللى بيحصل للناس دا عامل مشكلة جامدة خصوصًا فى المواقف اللى مش لازم فيها ضحك خالص؛ لأنه مش مكانها ولا أوانها.. ودا اللى حصل فى عزا أبو واحد صاحبى.. بعد السكينة اللى كانت الناس فيها وكأن على رءوسهم الطير.. مرة واحدة لقيت خلق الله كلها اللى فى العزا جالها هستيريا ضحك وكركرت من الضحك، وكمان فى اللى وقع على قفاه فى الأرض من كتر الضحك.. لأنهم كلهم افتكروا مشروع الميت يوم واللى فكرهم الميت الواحد اللى هم جايين يعزوا فيهم.. معذورين والله.. بس أنا كمان مكنش عندى حق، وأنا بعزى صاحبى ولقتنى بقوله هات بالباقى زيت.. أصل الانتخابات قربت.
