كلام حسن البنا.. إبراهيم عيسى يفتح النار على منهج دراسات خامسة ابتدائي|فيديو
فتح الإعلامي ابراهيم عيسي، النار على منهج الدراسات الاجتماعية للصف الخامس الابتدائي طبعة 2021/2022.
منهج حسن البنا
وقال ابراهيم عيسي خلال برنامج "حديث القاهرة" المذاع علي قناة "القاهرة والناس":"في صفحة 26- الدرس الثاني يتحدثون عن أهم إنجازات بعض الخلفاء الراشدين، تعلمنا في الدرس السابق أن النبي صلي الله عليه وسلم أقام أول دولة عربية إسلامية.
وتابع: هنا أتساءل مين قال إن النبي أنشأ أول دولة إسلامية؟..هل تبدو هذه حقيقة ندرسها لأبنائنا؟..اذن من يريد ان ينشئ دولة اسلامية لديه حق في فكرته من باب ما قام به النبي، ومن يعزز هذه الفكرة الأصوليون والسلفيون وابن تيمية وبن عبد الوهاب، ولكن الحقيقة ان الإمام محمد عبده يقول لأ، والشيخ مصطفى عبد الرازق يقول لأ، انتى كدولة مصرية مين فيهم؟ هل رأيك ان الاسلام دين ودولة مثلما يرى حسن البنا؟".
فكر الإخوان والإسلام السياسي
وتابع:"اللى بيقول الإسلام دين ودولة أصولي ينتمى إلى فكر الإخوان والإسلام السياسي، وفي منهج الدراسات للصف الخامس الابتدائي ممكن ميكونش لا اخواني ولا سلفي وملفه في الأمن الوطني فلة ولكن اللي بيقوله كلام حسن البنا".
الخلافة الإسلامية
وأكمل:"اللى بيقول الخلافة الاسلامية ده تيار الإسلام السياسي، وإحنا كده بندرس لعيالنا أفكار حسن البنا والسلفيين".
الملوك والأنبياء
وأوضح: سيدنا النبي نبي مش ملك، وتعبير الدولة مكنش متداول ولا معروف ولا النبي جاب سيرته، أنبياء اليهود اللى كانوا ملوك وأنبياء، وكان الرسول محمد صلي الله عليه وسلم بيقضى بين الناس لما كانوا بيروحوا له وكان بالمناسبة بيتوسط عند ناس وبيرفضوا الوساطة" ولفت:"المسلمين اللى علموا دولة مش دولة إسلامية".
نظام خلق داعشي
وأشار ابراهيم عيسي:"في دراسات خامسة ابتدائي بيقول الخلافة نظام إسلامي ظهر بعد وفاة الرسول صلي الله عليه وسلم، يبقى كده خلاص الطالب في 3 اعدادي هيجيلي الإخواني والسلفي ويقولي يلا عايزين نعمل دولة الخلافة طالما نظام اسلامي، وفي 3 ثانوي اخش التنظيم وعلي أولى جامعة افجر نفسي علشان اعمل النظام الإسلامي".
اختراع بشري
وعقب:"والله العظيم ثلاثة الإسلام ما قالنا إن فيه خلافة ولا القراآن قالنا فيه خلافة ولا أي حاجة خالص إنما هو اختراع بشري 100% لتنظيم أحوال الناس دولة زي اي دولة، ونظام زي أي نظام، هو ده اللى بندرسه لأولادنا".
الجهاد في سبيل الله
وتابع:"يقول في الكتاب من أهم إنجازات أبي بكر الصديق رضى الله عنه، إرسال جيش أسامة الي بلاد الشام، ووجه أبي بكر الصديق أنظار المسلمين الي الجهاد في سبيل الله، مينفعش وجه المسلمين لحماية اطراف الدولة والمسلمين؟ لإنهاء القلاقل، هل انتوا رأيكم ان ربنا سبحانه وتعالى قال للمسلمين روحوا اغزو مصر والعراق؟ هل الجهاد يعني غزو الدول الأخرى؟ يبقى انت اخواني سلفى جهادي داعشي قاعدة.
