عمرو أديب يعلق على هزيمة الزمالك: خسرت الرهان والنادي مش هياخد حاجة تاني خالص
علق الإعلامي عمرو أديب، على خسارة الزمالك من الوداد المغربي ضمن دور المجموعات بدوري أبطال أفريقيا، بنتيجة 1/0.
خسائر الزمالك الموسم
وقال عمرو أديب خلال برنامج “الحكاية” المذاع على قناة “إم بي سي مصر”: "أنتو عارفين إن أنا زملكاوي وبدفع ثمن انتمائي ده لحد دلوقتِ، ومهما كان الوضع كنت بقول الزمالك هياخد بطولة الدوري وأفريقيا وكنت براهن على كدا ولكن السنة دي أنا بأكد لكم الزمالك مش هياخد حاجة خالص وبقول لكم من بدري أهو لا دوري ولا كأس ولا بطولة أفريقيا".
وضع غريب للزمالك
وأضاف: "الوضع اللي الزمالك فيه دلوقتِ غريب وعجيب النادي دا وقت لما ما كانش لاقي ياكل ومفيش مجلس إدارة خد الدوري وعندما استقر النادي وبقى فيه فلوس زي ما قالوا لنا الهزايم تتوالى".
مشكلة الزمالك منذ 20 عاما
وتابع: "الزمالك فيه دايرة ما بتخلصش من 20 أو 25 سنة على حالة اصل فيه أزمات في النادي بنبني من أول وجديد ولم ننته، كل شوية نغير فريق، والنهاردة مشوا نص اللاعيبة، كان الزمالك ملكي وملعلع بنفس اللاعيبة اللي كانت بتلعب النهارده، والنهارده يقولك النادي محتاج وقفة، طيب والأندية التانية مش محتاجة وقفة ليه، هيفضل الزمالك في دايرة الزمالك محتاج وقفة ولازم نغير الفريق، طب وبعدين وآخرتها ايه، دا احنا شوفنا الأهلي في أسوأ مراحله وهو بيغير فريق كامل كان مشكلته موسم واحد النهاردة عنده فريق بالملايين وفريقه طاير، دلوقتي بقولكم الزمالك لا هياخد دوري ولا كأس ولا أفريقيا وأشك إنه يحافظ على المركز الثاني في الدوري لأننا قررنا نفك الفريق ونركبه تاني ودي فيها سنتين تلاتة وربنا معانا".
وكان فيريرا المدير الفني لفريق الزمالك انتقد المدرب السابق للفريق باتريس كارتيرون وذلك عقب الخسارة أمام الوداد المغربي في البطولة الأفريقية.
وقال فيريرا خلال المؤتمر الصحفي عقب المباراة: "طريقة اللعب تخص المدير الفني، واللاعبون هم من يساعدون في نجاح أي طريقة لعب، وتابعت تقارير لمباريات سابقة، ووجدت أن الزمالك كان يلعب بنصف الفريق دفاع، وباقي اللاعبين هجوم بدون وجود خط وسط ثابت، وهو ما أثر في الفريق وجعله يبتعد عن صدارة المسابقة".
وفي نفس السياق انتقد أسامة نبيه المدرب العام للفريق ما حدث للفريق في بداية مشوار البطولة الأفريقية بقيادة باتريس كارتيرون حيث قال: "الزمالك لم يحصل إلا على نقطتين في أول 3 مباريات مع كارتيرون ومن المفترض أن ينافس الفريق على الصعود من أول 3 مباريات وليس في آخر 3 مباريات".
